上個禮拜打完風，班建築界老行尊話開車去澳門玩吓，仲諗住夜晚睇埋煙花，點知天朗氣清都話因為颱風要延期，有時政府嘅決定真係好難理解。咁我哋成班人就去咗永利皇宮裏邊嘅永翠宮睇住個噴泉靚景，嘆吓各色小菜。
喺澳門嘅高級餐廳，由帶位到斟茶嘅妹妹弟弟都笑容可掬，服務周到，幾乎唔使開口都識得斟茶落單，同佢哋傾多幾句，原來都係來自內地五湖四海，個個都話好鍾意喺澳門做嘢，因為唔使管住佢哋住邊，搵多啲錢又自由自在。
點知我哋食緊嘢嘅時候，就收到訊息話勞工福利局局長孫玉菡喺社交平台宣佈將會停止輸入建築業外地勞工。同台老友即刻拍晒枱，話係咪假消息，點解明明係發展局負責嘅輸入建築勞工，會係福利局當係功績咁樣公佈。而家香港係咪真係要行福利主義，建築商人想部署用多啲外地勞工減少建築成本，話停就停。
早幾個月先至話有國際調查香港係全亞洲建築成本最貴嘅城市，做建築師嘅朋友就話香港政府官僚當道，建築師最少花四成工作時間係用嚟填表同埋回覆部門嘅要求，咁樣就梗係拖慢晒個工程進度增加成本啦。要改變呢啲官僚習性真係好難，但係你睇吓澳門引入外地勞工係幾咁成功，開車過去經過港珠澳大橋出邊成笪地塵土飛揚，就係起緊啲經濟房屋比中產同基層居住，政府只係收返個建築成本。
澳門早喺1988年就正式批准輸入外地勞工 ，1991年輸入外地勞工達11,331人，1992年有9,728人，1993年有10,256人，比1992年增長20%；1994年底就增至31,206人，當時約佔全澳門就業人口14% 。去到舊年，澳門外勞人數為165,273人，成個澳門人口先至有683,700人，咁你話外勞勁唔勁，呢個增長速度可以話同澳門開放賭業之後嘅急速增長同步發生。最重要嘅係澳門總體失業率只係2.8%，咁即係話澳門本地人都已經向上流動做緊啲更加重要嘅工作崗位。
好似我哋喺永翠宮食大餐，唔同菜式嘅廚師都係來自大江南北，個獅子頭好少做到咁大件，慢煮牛肋骨就保留到啲肉味，香茅乳鴿就比起廣州花園酒店嘅著名菜式差咗少少，但係你話冇咗呢班外地大廚，澳門嘅酒店又點樣可以吸引咁多遊客呢？
曹參國
註：專欄作家言論不代表本網立場
密切留意BossMind動向！立即CLS
留言 1
TTY
最注重勞工權益的工聯會不知是否支持輸入勞工？
09月11日01:09
顯示全部