國內電訊業「猛人」王曉初8月底「一夠秤」就退休，卸任中國聯通(00762)董事長兼首席執行官（CEO），追隨王總超過20年嘅聯通董事會秘書翁順來（Jacky)亦都有新搞作，出年1月「升呢」去「中巴」中華汽車(00026)嘅行政總裁（CEO），年薪342萬元！
熟悉電訊股嘅人都知，王總先後喺1999年、2004年同2015年加入中國移動(00941)、中國電信(00728)同聯通，次次都係董事長同CEO「一手抓」，一個人做齊某個行業幾間骨幹央企第一把交椅嘅，我諗除咗王總都搵唔到第二個。
而王總每次南下見投資者同傳媒嘅時候，身邊總會有位識講廣東話、高大筆挺、笑容可掬嘅Gentleman幫手，通常做MC，佢就係今日嘅主角Jacky啦。其實佢1997年已經加入當時叫「中國電信（香港）」嘅941搞上市，之後王總調職幾個月內都會跟住王總跳槽做公司秘書，所以Jacky亦都成為做齊某個行業幾間骨幹央企上市公司董事會秘書嘅香港人！
Jacky本身底子係法律同會計，以「董秘」身份兼任過幾間國營電訊商嘅財務部高層，但由於多年嚟肩負投資者關係嘅重要工作，對於電訊業日新月異嘅新科技亦爛熟於胸，否則點應付奄尖嘅國際投資者呀！所以市場都期待Jacky點樣為已經轉型做物業投資嘅中巴，引入5G等創新科技應用，以及憑住跟隨王總依位重要幹部多年嘅獨特際遇，運用對國情國策嘅了解，幫助中巴投資。
聯通同中巴聽起嚟無咩交集，但其實Jacky曾經喺1988至1995年中巴仲經營緊中巴嘅時候做過中巴嘅總會計師（CFO）。佢同絲絲講，話王總除咗祝福佢升呢做CEO一切順利外，有困難可以搵佢商量⋯⋯真係「忠臣不事二主」嘅典範啊！
東網網站 : https://on.cc/東網Facebook專頁 : https://www.facebook.com/onccnews/
