今次想介紹一間非常高質的日本燒鳥串燒居酒屋「鳥森」，呢度居然可以食到好多另類「雞串燒」！當中包括燒雞冠、雞腳筋、雞提燈、雞掌心等等！
一定要睇到尾！好多驚喜！
鳥森位於銅鑼灣的享利中心七樓，於本月尾正式開幕。
「鳥森」店舖名稱的由來主要是因為餐廳主打串燒雞肉，而且係日本食串燒9成都係以雞肉為主打，所以佢地都唔例外。
串燒雞肉的日文是「 焼き鳥」，故此鳥森取鳥字為名，森字字形亦是貌似雞爪因而得名。
鳥森這個餐廳名就是寓意森林裏的自由遊走的走地雞。
鳥森好特別地，係以「廚師發辦」的日本串燒店，食材部份特別選用上日本宮崎縣產雞隻製作，仲會嚴選最近期的時令部位以製作串燒。
而製作方式係使用紅木炭「炭燒」為主，燒出黎充滿炭木香，令雞肉串燒料班的炭火香氣更為濃厚入味。
而我今次要試嘅係佢地OMAKASE版串燒套餐「MORI SET」HK$580/位
總共包含左8款串燒，一款燒物，一款主食，以及湯+甜品。
我地先散叫點來來兩份前菜。
「味噌醬油漬大根」HK$38
非常入味香口，每件切成一口尺寸，食落咸香味重，帶少許甜味，好清爽！
「雞肝黑松露醬多士」HK$98
以一樽自家製的雞肝黑松露醬奉上，搭配6件脆卜卜的牛油多士，好豐富！
食落味道有雞肝的微甘，加上黑松露的香氣，非常香脆惹味，送酒一流！
串燒方面會有精選8款，係呢個時間師傅已經開始即燒雞肉料理啦！
燒雞腸
雞腸形狀幼細皺摺，師傅表示串製時有著相當的難度。
師傅選用了本地新鮮雞腸進行炭燒，再用上自家製雞汁調味提鮮，雞汁用上雞骨、雞胸、雞頸等食材精心熬煮 6 小時而成，因而口感是香脆入味。
我食落去真係好重油香，燒到脆脆地好香口，肉質好彈牙，咬落又好軟滑，醬汁味道好香甜，咸味唔重，諗返起都覺得好好食！
燒雞頸肉
呢一道亦都係唔簡單，全部都係心機之作。
師傅要將雞頸最多骨的部份起肉，而且仲要唔可以斷開而插得入竹簽上，無返咁上下大件肉條都插唔入，真係花功夫，食得好叼轉！
食落口感好彈牙，可能因為雞頸活動量大，真係好彈好彈牙！而且質感好滑好腍，燒得好香，而且少少骨都無，啖啖肉，好奢侈呀！
接落黎廚師發辦又有好多串燒緊接登場，可以現場親眼睇住師傅即燒，既係視覺衝擊亦有味覺享受，好正。
燒阿波美雞尾
佢地採用左日本阿波美雞的雞尾製作，油份重，好肥美厚肉！我地古時仲叫佢做百里香！因為燒起上黎百里之外都聞到佢嘅香味！
粒粒雞尾都肥美飽滿，味道係鹽燒口味，燒出黎好香脆好香口，咬落好肥好厚脂肪，油份好香，超邪惡！
而且佢無令人擔心嘅怪味，可以放心大啖咁咬！
燒雞心元
採用日本產雞心元，雞心元是雞心與雞肝之間的血管，用上大概六隻雞才可以串成一串， 口感彈牙，帶有脂肪、雞味濃郁。
一串有足7粒雞心元，燒到好濕潤唔乾身，有醬油調味好咸香，食落唔腥，香甜彈牙，有少少煙韌口感，嗒真肉質有甜味，好好食！
月見雞肉捧
雞肉棒採用惠比壽雞手打免治雞肉，燒至微脆，醮上經日本醬油醃製的日本蛋黃，味道微甜、層次豐富。
上檯時見到雞肉棒+雞蛋王醬油漬，個雞蛋王醬油漬到質感結實，似果醬質地；而雞肉棒質地軟糯，會食到有少少雞軟骨，口感豐富有層次，用雞肉棒沾上果醬質感的雞蛋王，真係比坊間嘅流質月見雞肉棒高質好多班。
雞掌心
用上本地新鮮雞人手從雞爪取出雞掌心，每隻雞只有2粒雞掌心，故此需要兩隻雞方可串成一串，骨膠原相當豐富，口感煙韌有彈性。
又係鹽燒口味，同醬油口味梅花間竹登場，更加有層次感。
原來雞掌心就係雞腳去皮去骨後的軟筋，所以食落好多軟骨同腳筋，質感超彈牙煙韌，韌性十足，加上鹽燒好香口，好味！
提燈
提燈係日本串燒界可謂非常矜貴，係IG都成日睇到日本居酒屋會推出而且唔係間間食到，絕對係高級食品！賣相都十分特別！
細問之下，原來提燈係母雞的輸卵管同埋尚未成熟嘅雞蛋黃。
咬落去個蛋黃有薄膜包住，入口時軟滑蛋黃係口裡面爆開！雞蛋黃呈半生熟狀態，有漿糊感，好濃雞蛋香，加上甜醬油真係非常之好味！
而末端的輸卵管部位偏油膩感，食落似雞腸，好JUICY！
櫻花蝦芝麻雞柳
將雞柳沾上蛋漿，再加入櫻花蝦、芝麻燒製而成。
食落雞柳較乾身，但有好香櫻花蝦味，芝麻亦好多好香口。
但調味上比較清淡，帶有淡淡櫻花蝦芝麻味道，調味上亦都可以配餐盤附有鹽、七味粉、柚子椒鹽，味道更清新。
燒物 (燒物是三選一，現時時令的三款食材分別為白鱔、厚燒牛舌芯、蛋黄漬虎蝦)
我地兩個人，一人選左厚燒牛舌芯，一個選蛋黄漬虎蝦，感覺比較特別！
蛋王漬虎蝦
用蛋汁來回包裹住虎蝦外皮，燒到蛋汁變成一層膜。
擺盤賣相都相當細緻，係你面前現場即製，係一種高級嘅感覺。
食落外皮有好香蛋味，但味道唔算好特別，就係蛋味。
而虎蝦非常厚實，好大隻好粗身！
味道好新鮮彈牙，質地好軟滑，好香甜，但係燒乾左少少唔夠多肉汁。
厚切牛舌
上圖都見到牛舌同大蝦同步燒，牛舌本身都係串燒狀態，師傅都會拆開切成一口尺寸，擺盤精美高雅！
牛吞賣相同樣華麗！伴以青芥末及黃芥末。
食落牛舌真係好厚身，好爽滑彈牙，好厚儲左好多肉汁，勁JUICY！
再以牛舌沾上青芥末莖切成的醬汁，辣辣地，少少咸，好刺激好鮮味。
最後再送上主食，一份豬肉白布湯烏冬。
鳥森的白布烏冬，同坊間一整片方塊型的白布烏冬唔同，佢界乎係一條條好闊嘅麵條，非常滑溜，我想夾起佢來影相都有困難，可想而知有幾滑溜。
豬肉湯味道咸鮮味重，唔算特別口味，但勝在夠飽肚。
雞湯
師傅秉持毫不浪費的原則，選用新鮮雞骨等雞隻的副產品，再配搭蔬菜每天新鮮熬煮 6 小時而成，每日只可以生產出大約三十碗的份量，絕對算是精華並矜貴的雞湯。
飲用味道雞香出眾，鮮味解膩。
聽完解說，我再一試飲落好重雞香味，飲落咸咸地好鮮味，感覺到佢真係落足料！畢竟佢全店都係用雞肉做料理，一定可以煲出好靚好濃嘅雞湯！
紅豆綠茶牛奶布甸
使用 3.6 牛乳、糖、蛋白、抺茶、紅豆自家製成的抹茶紅豆蛋白牛乳奶凍，入口滑溜香甜，並帶有綿密的豆感和清香的茶味。
好香甜軟滑，真係唔錯！
食完個套餐，覺得仲未夠喉，於是再單點左幾款必試小食！
我覺得當店必食第一位，一定係燒雞冠！
燒雞冠 HK$48
首先想講佢地用本地新鮮雞取公雞的雞冠，你可知農場的繁殖雞隻甚少會養雞公，因為雞公肉質並唔夠滑，又唔識生雞蛋，所以公雞好多時一出世已經被消失，莫講話要見到公雞出現市面，所以一串雞冠係幾咁難能可貴？
食落味道係鹽燒，燒得好焦脆，口感爽脆彈牙，但令我好驚係咬開裡面仲有少少脂肪，外脆內軟，好好味呀！
一夜干雞翼 HK$48
一夜干目的係為左抽乾水份，然後調味料就會更加容易入味，所以食落味道較咸，燒起亦較乾身，但相對雞味好濃肉都好滑！唔錯。
豬肉蝦串 HK$48
以豬肉捲住鮮蝦肉黎串燒，蝦肉燒出黎偏乾身，但都有少少吸收左豬肉油香，食落咸咸地，外脆內軟。
紫蘇里芋頭肉卷串 HK$48
今次呢個唔係雞料理，係用左豬肉片包裹住紫蘇葉+乾身芋頭，芋頭吸收左豬肉油份，令佢充滿豬油份。
食落味道有好香嘅紫蘇香草味，豬肉味強烈但醬油咸香味重。
芋頭吸收左油份好飽滿，但我嫌佢中間乾左少少，如果燒製時可以塗少少水份黎燒會更好。
味噌雞肉碎飯團HK$44
味噌雞肉醬有少少香辣感，燒飯團米飯燒完有點硬身，再伴以紫菜肉碎食用，夠飽肚。
----------------------------------------------------------
鳥森
地址：銅鑼灣恩平道42號亨利中心7樓
電話：5404 9964
營業時間： 1800－2200
----------------------------------------------------------
➥ 【窮遊達人】訂閱頻道－ https://www.youtube.com/c/窮遊達人MrTravelGenius?sub_confirmation=1
📝 TIMBEE LO shop - 官方時尚精品購物網站
【最新影片介紹】
足本節目 ⏬
Full Version ⏬
Facebook/YouTube 搜尋Search
🔥窮遊達人 Mr. Travel Genius🔥
🎬 YouTube Channel -https://www.youtube.com/c/%E7%AA%AE%E9%81%8A%E9%81%94%E4%BA%BAMrTravelGenius/featured
🅿️ Facebook - https://www.facebook.com/mr.travelgenius/
📸 Instagram - https://www.instagram.com/mr.travelgenius/
