歌手胡鴻鈞（Hubert）喺社交網站自爆被人偷影！事緣佢收到朋友Message指見到個熟口熟面、好似佢嘅人喺港鐵車廂唱歌，Hubert承認係自己之後，仲大方轉載「偷拍片」自嘲樣衰，留言講反話讚耳機隔音一流︰「我以後都唔敢啦！呢一刻好想搵個窿捐！」
片段中見Hubert戴住深色Cap帽，頭挨玻璃兼手拎住部電話，一臉陶醉咁高歌新加坡歌王林俊傑首名曲《修煉愛情》，簡直好似喺港鐵開緊騷咁，為嚟緊演唱會做熱身，唱到興起嘅時候仲不自覺合埋眼又印印腳添！「完騷」之後見Hubert變回普通市民孭番個背囊，手插住袋咁離開車廂。
個Post一出吸引有好多圈中朋友留言，吳若希打咗幾個笑喊Emoji話「好好笑呀喂！」、何雁詩笑問佢「做咩嘢？」、而釗峰同王君馨就給予鼓勵「呢啲咪專業囉，邊度都係舞台！」、「地鐵車廂係創意之地，我以前成日都係搭地鐵喺腦入邊排舞！」亦有Fans支持話：「咁好聽就唔怕啦，再大聲啲都仲得！」、「果然係實力派歌手」、「係咪播緊歌咋？咁好聽嘅！」，大讚偶像係「行走CD」！
東網網站 : https://on.cc/東網Facebook專頁 : https://www.facebook.com/onccnews/