「唉！鏞記個老夥計打電話來，同我say goodbye ，話畀公司炒咗喇。疫情前鏞記仲話掟咗4000萬來裝修，頂咗咁耐，趁強積金正式取消對沖前，炒咗好多人，剩番啲仲認得我嘅老臣子。Louise，你舊老細肥佬黎以前認真好福利，請鏞記入去搞canteen，你以前喺將軍澳堆田區都食過唔少燒鵝啦，哈哈。」被網友留言謔稱為 「三高小王子」的楊國佳致電來說。
不得不回敬一句：「 楊老闆，你攞景定贈慶？家陣飯碗都打爛埋，仲講食燒鵝？」 不過，回憶起又幾開心，以員工價食到中環米芝蓮嘅燒鵝飯。
軍機護送富貴鵝
但楊老闆的回憶仲過癮， 佢話睇電視見到菲律賓總統小馬可斯由母親「馬可斯太夫人」陪同登基，就憶起鏞記的「飛天鵝」。80年代馬可斯任菲律賓總統，除咗記得佢老婆艾美黛3000對高踭鞋之外 ，就係在鏞記預訂出爐的「飛天鵝」，仲要計準時間以軍機由啟德送返菲律賓開party食。如此奢華，飛天鵝都變「富貴鵝」。還憶起鏞記以前好多諗頭， 係第一間食肆在國泰航空雜誌登廣告，國泰頭等艙亦曾以鏞記燒鵝作美食。 早幾年，仲有好多東南亞嘅旅客，專程來鏞記品嚐燒鵝。
左脾與右脾之別
聽楊老闆講得隻飛天鵝咁過癮，即管試下， 果然鏞記嘅老臣子一聽到有客人訂 「飛天鵝」額外醒神， 現時搭飛機已經難，乜仲有客帶埋飛天鵝上機？
老臣子非常雀躍，彷彿重拾昔日客似雲來的回憶。 飛天鵝包裝猶如手提行李，取鵝後車程一個多小時仍保持溫度，正在家中操刀劈鵝之際， 楊老闆來電問味道如何？ 知否為何左脾好味啲？咁真係考起啦。
佢話：「嗱， 我都係聽人講咋，隻鵝疴尿時，會趷起右脾，咁個重心就係左脾，所以左脾的肉結實啲。呵呵！」聽後覺得這盛惠850元的飛天鵝實在太有娛樂性，亦讓我回味在堆田區享用鏞記燒鵝飯盒的日子。
Louise
註：專欄作家言論不代表本網立場
密切留意BossMind動向！立即CLS