九巴大埔公路19死嚴重車禍，令外界關注巴士管理及經營問題。網上今日流傳一段懷疑是九巴內部會議的錄音，一名疑似九巴員工力數公司四大不足，包括車長待遇、人手不足、制度等問題，當中粗口橫飛，極具火藥味。九巴工會指，有關錄音是從由車長群組傳出，但並非內部會議；本報亦正就事件向九巴公司查詢。
根據流傳的錄音，一名男子爆粗力數九巴推卸責任，將車禍責任全數諉過巴士司機，「做齊晒所有野，無出錯、無發生交通意、唔遲到，先得萬六七、剩返兩三千點嚟？就係狂OT！呢啲你唔X講？咩都推X晒落巴士司機身上！你唔講吓制度，咩制度促成？」 該男子又直言，今次出事的872號線為特別線，極麻煩又危險，沒有全職司機願意駕駛，因此只能找兼職司機，「點解要搵可能有問題或唔成熟嘅司機呀？因為唔X夠司機囉！成件事關鍵都唔X知！」
他又批評，「你將個（司機）個標準提升到同差佬一樣嘛，佢哋有無差佬人工？佢哋有無兩、三萬人工呀？無呀！咁你用乜X嘢警察態度！」
他更點名批評時事評論員黃世澤以德國巴士司機作比較，「你XX！如果香港司機有德國嘅福利、工時同收入，佢哋都可以做到咁X高水平啦！宜家根本問題係請唔夠司機，咁就會有好多兼職司機，佢哋好多時心態都係趕時間、唔認真、唔抵得比人鬧」。
九巴員工協會副理事長郭偉光回應本報查詢時表示，有關錄音由車長群組傳出，相信與九巴內部會議無關。他直言，現時九巴長工時、低工資，造成不少人才流失，他以自己為例，入職30多年但工資與20年前沒有分別。他指出，雖然九巴招聘廣告指車長收入可達1.9萬元，但其實是包括獎金及OT，大部分同事為賺滿1.9萬元，需要不斷OT。他直斥，九巴要求車長內外兼修，但沒法提供無相應的福利，更遑論與國際標準去作比較，難以留住人才。
郭偉光又批評，九巴管理層賺到盡，人手不足就以兼職司機代替，當中不少兼職司機只是年輕的巴士迷，「唔當係一份工作，唔珍惜，車品唔好」。他又斥責運輸署監管不足，深水埗城巴奪命車禍後曾承諾改善工時等問題，惟至今仍未有實際行動。
留言 0