Beyond靈魂人物黃家駒不經不覺離世30年,無綫製作特備節目《永遠光輝 黃家駒》懷念家駒,節目中肥媽透露家駒生前為她寫了一首歌《感激這對手》,該歌一直未有發布,節目中肥媽在錄音室錄歌,還哽咽說:「我諗唔到佢會寫一首歌畀我,呢個好觸動我嘅心,真係我嘅榮幸。」
今天家駒的胞弟黃家強則在fb發火寫道:「關於我的都是謊言,我哥哥雖然走了,我還活生生的,怎麼可以這樣不尊重人,無論是什麼途徑得到這首歌,誠實說出原因未必不能『感動』人。」
肥媽事後回覆《明報》時說:「廿幾年前佢(黃家強)曾經在一個宣傳活動,撞到佢有講過㗎,家強有講過話有一個餅帶係寫住肥媽個名㗎,好耐啦,如果唔係我點會記得咁清楚啫?如果佢(家強)唔係講過嘅話,嗰個所謂經理人打畀我嘅時候,我點會唱呀?同埋我唱呢隻歌,有咩得益啫?我亦唔需要宣傳,我又唔需要呢隻歌帶畀我任何錢。」
肥媽愈講愈㷫:「你有時無意中講嘅嘢唔記得,唔可以話我作嘢,我真係冇作嘢,我作嚟做咩?如果唔係點會佢經理人同我講,你知唔知家駒作首歌畀我?係咪我唱咗家駒呢隻歌會發達吖?唔係㗎嘛,我都係尊重佢,佢作畀我唱㗎咋,我冇得益㗎,我完全唔要得益㗎。
人哋都係紀念你大佬啫,使唔使咁講嘢呀?我利用你啲乜嘢啫?我利用你啲乜嘢喎?(家強和他前經理人反面?)呢啲係你嘅事呀,大佬,係咪呀?你同佢反面,有乜理由攞我嚟『熬』㗎啫,唔關我事嘛,大佬呀﹗冇理由屈我嘛,大佬,我呢排已經成日畀人屈,個個都係咁,我不嬲都係做好心,成日屈我,個個都係咁呀﹗」
肥媽同時向《明報》提供一張有歷史痕跡的錄音帶照片,其中寫上「II 肥媽」字樣,指稱是家駒的Demo。
(即時娛樂)
留言 14
nw
屈我啦屈我啦, 我無問題㗎!
2023年06月26日10:23
有術有道,上善若水
我都識一個大叔叫肥媽…..叫肥媽就一定係你咩?
你收到餅帶都去確認下先啦?
2023年06月26日13:04
K
又係依隻大肥西!收皮!
2023年06月26日12:59
比叡山Brinny
話時話,我屋企仲有《民主歌聲獻中華》有肥媽唱個段餅帶
2023年06月27日02:02
KaKAian(卡卡喵)
成日出黎抽水
上次抽nelnel水衰左
今次又黎
2023年06月27日02:01
顯示全部