一向在MV中以帥氣登場嘅 #呂爵安 Edan，今日推出新歌〈月光奏明曲Moonlight Sonata in “E” minor〉，以極度邪惡造型拍攝MV，顛覆以往MV作風，唱出以偏概全的社會病態，惹人反思。
🌙Edan今次新歌一睇歌名，大家一定會諗起貝多芬〈月光奏鳴曲〉，但為何歌名會略有不同呢？Edan道出歌曲創作靈感道：「呢首歌已經做咗成年，當時係想做一首Classical加跳唱嘅作品，跟住就揀咗貝多芬〈月光奏鳴曲〉，然後我哋再諗用月亮去延伸，諗下講咩好：月亮本身唔識發光，只係因為太陽嘅照射，人類喺地球上望上去，先見到月圓月彎唔同形狀，但佢本身係暗黑球體。我哋跟住諗到，想藉此比喻喺資訊咁發達、速食嘅社會，我哋睇每一件事就好似太陽照落去，佢係咩形狀就係咩形狀，唔會細心用時間去研究。」而經過填詞人T-Rexx的巧思，歌名中的「鳴」變了「明」，有道出真相的含意，而英文名亦將歌曲原本C Sharp minor的調子，變成了E minor，Edan續道：「E就代表Edan，而Major、Minor平時喺音樂上有大調、小調意思外，其實亦有主流、非主流嘅意思，而今次歌曲係屬於Edan一啲Minor嘅想法，所以就用上E minor。」
😈而為突出歌曲主題，〈月光奏明曲Moonlight Sonata in “E” minor〉MV上的造型亦很特別，Edan除了會彈著鋼琴現身外，他亦化身成惡魔！Edan親自介紹道：「造型上好特別，係以惡魔形態出現，而且係唔同階段嘅進化，化妝同造型都好大突破，係以往冇試過。其實最初一聽到呢首歌就已經好想有呢個模式、變身嘅狀態——上咗月亮，落返嚟就變咗另一個形態，呢個concept喺好耐之前已經喺我腦海裡面有畫面，所以好多謝導演可以幫我實行到呢樣嘢。」而這個十分突破的造型，亦令Edan回想起過去參加《全民造星2》時的Joker造型，Edan道：「呢個造型令我諗返起《造星2》玩Joker嘅一啲瘋癲同黑暗形態，又或者係哈利波特嘅表演，但Solo作品一直未有呢個機會，今次係幾好嘅Timing去嘗試。」
👿惡魔的造型以漸進式呈現，有少少煙燻眼狀、塗黑手指甲再配以道具指甲，到臉上的紋愈來愈多，雙手以彩繪形式塗至漆黑，再配以黑色翅膀，是Edan前所未有的邪惡！Edan感激地表示：「以前都未試過呢啲造型，製作過程需時都比較長，真係辛苦化妝師幫我搞，唔簡單！出嚟效果好滿意。」Edan更謂，他飾演的惡魔，其實揭露了世界人類的醜惡。
▼Follow 熱話HOTALK
Instagram: https://www.instagram.com/hotalk_hk/
Facebook: https://www.facebook.com/hotalkhk
留言 0