由梁祖堯（阿祖）、湯駿業（AhDee）及邵美君（阿君），聯同趙學而及Jace陳凱詠一同演出、一連21場的《隔離童話集》音樂劇場於昨晚（8月12日）於葵青劇院演藝廳開騷。
今次演員名單上，位位都係唱得之人，所以身為編劇的阿祖在撰寫劇本時，也特別加入多首廣東歌在內：「戲裡面有好多首歌，跨越唔同年代，由我自己聽得最多歌嘅年代，即是中學尾大學頭嗰個年代嘅歌，至到近呢一兩年嘅歌都有。點解會揀呢啲歌？因為覺得呢啲歌好啱呢個主題，去到嗰一個情節，突然覺得呢隻歌啱，就用呢隻歌。有啲歌好Hit，有啲Side Track到不得了，我諗講出嚟都冇乜人知嘅歌，但今次化學作用好得意，非常之有趣，希望大家都鍾意我哋揀嘅歌。」
首晚觀眾反應熱烈，特別是聽阿君演唱時更是拍爛手掌，阿君自己也始料不及，她說：「有一Part唱歌嘅時候都好大反應，我自己都好開心，呢啲反應都係對我哋嘅支持，會俾心機再做好啲，等每場嚟嘅觀眾都可以欣賞到呢個Surprise（驚喜）。」
至於特別加盟演出《隔離童話集》的學而，以一個超浮誇的造型示人，令她在台上一步一驚心，學而說：「今次套衫有一對15cm高嘅高踭鞋，有一條好長嘅拖尾，好似一張雙人棉枱咁大，另外仲有一件外套係用好多鐵絲做成，好重，再加埋一個梳得好高嘅頭，十分搶眼。我喺台嘅走動係比較路途遙遠，因為要著一對15cm高嘅鞋，然後要行一條好長嘅樓梯，會比較吃力少少，不過大家都好好，兩旁都有演員喺度，大家都會顧住我嘅安全。」
說到今次演出，學而與Jace在綵排期間已經動了真感情流下真眼淚，而正式公演時，她與Jace亦一樣眼濕濕喊住唱歌，學而說：「無論鬧交戲、開心戲都係真感情嚟嘅，冇感情做唔到㗎！因為嗰場戲係好感動，感動到兩個人都眼濕濕，當中最難係好想喊時但又要唱歌要Hold住情緒，如果唔係就唱到喊住口。」
Jace也心同感受：「絕對會係動咗真感情，因為每次做戲都係用真感情去帶動，今次能夠同前輩學而合作，亦有風車草3位教導我，每次排戲時可能都有嘢唔同，但每次都好真摯，好感受到每次做舞台劇，大家嘅靈魂好真摯地去交流，覺得呢樣嘢係好珍貴，所以好多謝佢哋教我去試多啲，唔需要怕。」
