MIRROR人氣王姜濤早前忙於拍攝處男電影《阿媽有咗第二個》以及演出《拉闊音樂會》，不過兩樣工作日前已相繼完成，暫時他可以有多少少時間休息，以便稍後又要準備12月跟其他MIRROR五子一同演出的音樂會。姜B一有時間當然就去打籃球，因他曾指打籃球可以讓自己放鬆，昨晚（29日）姜B在IG限時動態貼出跟髮型師打籃球的幾條短片，而他更在片中公然坦認欺負對方！
在片中見姜B和髮型師在室內籃球場打波，他一邊用身阻擋對方搶波一邊說：「man, come on.」負責拍片的女士笑說：「你（指姜Ｂ）大人成個碼，大佬！」的確姜B比起他的髮型師高出半個頭，身型更橫更大隻，對方根本毫無招架之力。
之後幾段片中，髮型師皆盡力去搶波，可惜他根本完全搶不到波，姜B繼續招積地說：「Almost….man, come on.」髮型師一度由後面攬實姜B，但依然不成功；當姜B把籃球舉高，而髮型師跳高搶又不成功之時，拍片女士笑說：「你（指髮型師）好似馬騮搶波。」最後姜B成功射籃入波，可見他心情十分愉快，果然有波打寧舍不同。
