X宣佈將直播功能轉為付費會員功能

近年越嚟越多人使用直播功能，大家可以透過唔同嘅社交媒體平台去進行免費直播，例如Instagram、Facebook、YouTube、Twitch等等，但近日大熱社交媒體X宣佈將直播功能轉為付費會員先可以用，令X成為第一個直播功能要收錢嘅社交平台，到底呢個係一個趕客行為定係一個發達大計呢？

之前X已經推出咗可以編輯發文內容、發佈長文同唔洗睇廣告嘅功能去吸引用戶俾錢訂閱，而且有不同會員等級，分別係每月3美元嘅「Basic」、每月8美元嘅「Premium」同每月16美金嘅「Premium+」。而今次直播功能X採用了自家編碼技術，但就未有明確講穩定性同流暢性等各方面有咩優勢，亦冇公布需要訂閱咩等級先可以使用直播功能，睇嚟好多資訊都需要等真正上線先知道啦。

呢個措施一出，就引嚟唔少嘅討論，有人就話呢排X喺咁推出唔同嘅收錢措施，根本就係發錢寒，但又有人認為X用戶對X嘅黏著度咁高，相信可以吸引唔少人訂閱，亦係一個吸金方法。X推出嘅收費功能喺好多社交媒體可以免費做到，要俾錢嚟講就真係唔太吸引，甚至有機會將客戶送俾其他社交媒體。不過如果X真係做到比其他社交媒體嘅更優勝，獨特嘅直播服務，就唔同講法啦。等到措施正式實行之後，就知X有冇當啲用戶係水魚啦！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/