張敬軒處男執導大壓力！親身經歷感受深刻「想向呢班『前夫』致敬」

張敬軒早前受手機品牌邀請出任導演，以全手機拍攝手機電影《前夫的愛》。今次是軒仔處男執導，向來高要求的他坦言非常緊張，「喺拍攝現場，全部crew嘅工作人員都突然間改口叫我做『導演』，每次聽到我都覺得好大壓力，不過亦都因為呢個壓力，驅使我有個動力，希望做得更加好。」

編劇陳詠燊Sunny Chan最初預備了4個劇本，二人商討後，決定選用現在的故事，軒仔亦表示最喜歡這個劇本。「雖然呢個只是虛構嘅故事，但實情喺我身邊係真有其事。曾經有位男友人問我，可唔可以幫佢拎到MIRROR嘅海報，仲話係不惜任何代價，佢話好想送俾佢太太做禮物氹佢開心，所以呢個男仔成個過程係排除萬難，用盡各種可行方法，只係希望拎到張海報令佢心愛嘅人一笑。我喺成個過程入面見到好有愛，所以好想將佢拍成電影，向呢班『前夫』致敬。」

軒仔對於去年出現的各個社交群組例如「前夫關注組」等，一直有深刻感受，覺得這份情十分難得罕有。軒仔透露最喜歡的部份：「我會選一開始飾演『換燈箱職員』嘅陳湛文，去到最後有一個反高潮嘅鋪排。」不過軒仔亦溫馨提示大家：「故仔係純屬虛構，偷嘢係唔啱㗎。」

最後在製作過程中，軒仔表示最困難是經驗不足，「唔好話經驗少，係直頭冇呢方面嘅經驗呀！哈哈。」軒仔十分感謝團隊的幫忙，「無論係監製編劇嘅Sunny Chan，定係美指嘅張蚊，定係整個團隊，不能一一盡錄，有佢哋嘅幫手、參與，先成就到呢件事。」同時亦令軒仔有另一番的體會，「因為之前一直係從藝人或者演員嘅角度出發去工作或去睇一件事，但當調番轉頭，從一個幕後、一個導演去睇番出嚟，又係另一回事。」

View this post on Instagram

A post shared by Hins Cheung 張敬軒 (@hinscheung)