立法會議員開地方辦事處應屬尋常事，之不過一次過開4個地辦，就與眾不同兼先聲奪人喇！講緊嘅就係新界東北直選嘅李梓敬，佢今日(13日)就新翠邨、沙角邨、瀝源邨及駿洋邨嘅地辦舉行開幕儀式，期間黨友同官員大讚佢能力，仲指睇住佢大，老懷安慰喎！
就好似黨友、行政會議召集人葉劉淑儀指，同一時間開4個地辦好有效率，加上新界東北有成70萬人，工作相當繁重，希望李嘅團隊繼續努力，仲寄望同場嘅民政及青年事務局局長麥美娟，未來講述多啲18區關愛隊點樣組織，令到更多市民受惠。至於麥美娟就指自己同李梓敬曾經喺葵青區議會共事，可謂睇住佢大，見證佢茁壯成長，真係老懷安慰，亦都希望佢喺民生事務上了解居民需要，總結同累積抗疫經驗服務社區。
至於主角李梓敬就指多謝咁多位前輩提點，又指不能靠個人單打獨鬥，仲感激黨友容海恩留咗新翠邨嘅資源比佢，指雖然過往區議會失利，但都好快爬番起身。至於近日捲入「爺媳事件」嘅容海恩亦有上台剪綵，不過就未有發言喇。
東網網站 : https://on.cc/東網Facebook專頁 : https://www.facebook.com/onccnews/
留言 0