MIRROR成員呂爵安（Edan）昨晚年三十晚（9日）在社交平台先貼出留鬚照後開Live講足100分鐘，又應網民要求開Live剃鬚，他自爆上次留鬚是因為中covid，而今次留鬚是因為再次中招。「前兩日開始唔舒服，一test發現有咗covid，好頭痕，仲以為新年放假可以亂食嘢同玩，點知有咗（covid）。」今個新年，Edan坦言自己只好留在家中打機度日。
Edan昨晚開live有過萬名網民同時看他直播，他先鬧着玩剃一半，笑說：「一邊係青靚白淨Edan﹑一邊係成熟Edan﹗」其間他多次高呼「Oh My God」，最後他索性剃埋另一邊。Edan全程「講經」講足100分鐘以上，內容包括MIRROR演唱會，以及他有演出的電影《盜月者》。
Edan先解釋今次留鬚原因，又表示開MIRROR演唱會前已患甲型流感﹑完成所有演唱會後中COVID：「嚟緊都唔出街，喺屋企直播打機，但大家唔使擔心，前兩日辛苦少少，有啲發燒，𠵱家有啲痰及鼻水，真係冇乜事，見到我笑得咁精靈。」
Edan表示早前中「甲流」極度辛苦。「由12月尾開始，把聲冇好過，咳到傻，去到叱咤把聲都搞唔掂，要食類固醇頂硬上，演唱會開頭都Keep住咳，把聲有啲差，硬係唔在狀態，演唱會到𠵱家都睇中醫食中藥，個中醫好犀利，先頂到演唱會，把聲冇乜咳，舒服…踩台綵排時，要去針灸，但我冇特登講，點解唔講？因為一講會Foresee到啲標題：『MIRROR又病』，『開騷又病』，所以算啦，完咗先講，我只純分享，唔係要做啲乜，費事講。」
Edan又提到演唱會表演環節中自彈自唱〈E先生連環不幸事件〉，他得知有留言稱「好悶」，直言：「演唱會唔係淨係畀你一個人睇，你想睇啲咩呢同其他人想睇啲咩，或者我想表演啲咩完全係兩回事。」他表示今次是紅館補場，另一考慮是巡迴演出，「會諗其他觀眾想睇啲乜，我就諗佢哋想睇E先生自彈自唱一次〈E先生〉。」他補充第三個原因是監製莊少榮想保留，並直指一直沒收到通知能夠改歌，最後他揀唱較有信心的〈一表人才〉。他看到有訴求提出一日轉一首，解釋轉歌涉及監製、band leader徐浩及樂手等等，必須綵排充足，「唔係一件咁容易嘅事，或者你想我哋就做到嘅事，所以我想幫製作嗰邊講一講，唔係咁易㗎！」
Edan續說，衷心感謝大家入場支持﹐每次見到燈牌都感到溫暖和安全感，但他引述有粉絲抱怨：「你特登唔望我，或者望到我呢邊就黑面。雖然我就嚟脫粉啫，都唔使咁樣對我嘛？」他解釋：「我盡咗力，見到都會揮，如果真係miss咗，唔好意思。我唔係特登miss、或黑面唔揮手。」他又直指場內過萬觀眾，難以逐一對視交流，「我好明白大家好想同偶像有接觸，我哋都好盡力做呢件事…」
開live中途，Edan戴起眼鏡說：「大家唔好覺得，舉咗大字報，你就要望到…同埋有啲說話，少少變咗有啲情緒勒索，嗰啲呢可免則免…」Edan又提到有些留言也令他反白眼，「態度好明顯係由高而下，有一個教緊你嘅態度，而佢覺得佢講嘅嘢一定啱…少少舞你都唔跳好啲，唔該你認真啲啦！你咁樣只會令fans羞愧。」Edan認為：「有時大家諗嘢唔好覺得自己一定係啱，嘗試意圖操控你嘅偶像，美其名『為你好』，你覺得好未必真係好。」他歡迎大家提出意見交流改善，但態度方式必須要令雙方舒服。「大家有時自己做嘅行為，自己都要諗一諗係咪啱呢？」
