葛民輝舞台劇加破地獄場面　憶與許志安初嘗試：睇到好激動

由風車草劇團主的《Di-Dar音樂劇場》，將於8月9日起於葵青劇院演藝廳公演。劇團主腦梁祖堯、湯駿業（AhDee）、邵美君、首度夥拍葛民輝、岑珈其、何洛瑤（Sica）、鄧家杰（KaKit）、杜曦駿（Larry）、胡麗英（Grace）及梁浩邦一同演出。《Di-Dar》以面臨殺校邊緣的中學作為背景，並以殯儀業作為故事主軸，為呈現殯儀業的真實一面，一班男演員特別去學習破地獄儀式。

早在撰寫《Di-Dar》劇本之時，負責編劇的梁祖堯已預定要寫一個跟殯儀有關的故事，他道：「一開始寫劇本已經知道要講中式殯儀，其中廣東殯儀裡面好多細節都好奧妙，今次有個殯儀顧問傑叔，佢教咗我哋好多嘢，發現原來每樣嘢都有意思，例如轉18個圈係代表十八層地獄。」在劇中，阿祖飾演法科師傅，而阿葛、AhDee、珈其、KaKit和Larry都要參與破地獄的過程，一班演員認真地學起破地獄的每一個步驟。在《Di-Dar》加入破地獄環節完全是別有用心，阿祖道：「一來好想傳承呢個精神，想多啲人知呢個好傳統嘅儀式，二來我哋未做過，喺舞台上做破地獄，好似好勁，有火噴出嚟好似好好睇。」

過去大家都曾參與過一些喪禮，看到師傅們的破地獄過程，其中珈其最難忘的是小時候的經歷，他說：「身邊有屋企人過身時，總會睇過破地獄。細個當表演睇，但屋企人會鬧，會叫我正經啲，唔好拍手。」AhDee則在今次跟隨顧問參觀時有很深感受，他說：「跟去睇人做破地獄，負責師傅喺度轉同噴火嗰下，唔知點解係激動，雖然先人我係唔識，但有一股感動湧出嚟。呢個設計，令到就算睇冇情感投放，都會撩動到大家嘅反應，傳統智慧好犀利。」

阿葛回想到過去拍電影時曾拍攝破地獄場面，他回憶道：「家人往生時，嗰種心情睇落去同珈其一樣，會俾家人話，燒嘢啦，好多嘢做緊，但拍電影《天才與白痴1997》嗰陣，許志安喺度破地獄，嗰陣我係坐蓮，坐喺蓮花上面，睇住啲人頌經、許志安破地獄，已經20幾年前，但感覺似一個表演，睇到好激動，而家仲記憶猶新。」

早前一眾演員第一次綵排破地獄儀式，但一試就知道難度極高，阿祖道：「最困難係穿步，我哋搞好耐，但傑叔本身做咗幾廿年，一嘢就做到。」阿葛也表示：「佢梗係簡單，行咗幾廿年，我都唔知點樣搞，佢做唔到慢嗰個版本俾我哋跟，好彩我哋有位高人AhDee，靠佢嘅法眼，洞悉成個局勢。」而珈其一聽就明，隨後更化身「助理編舞」，幫忙教導大家走位。

《Di-Dar》講述香港某一間面臨殺校邊緣的中學，財政緊絀，校長走投無路之下，決定弘揚中國文化，在學校硬推中樂，獲取巨大活動資助金吊命。學校突然傳出鬧鬼傳聞，為防止恐懼蔓延，校長惟有聘請法科師傅在校內舉行驅邪大會。