「吳林峰 明天一切如常演唱會」 邀生命中兩大重要男人任嘉賓

「吳林峰 明天一切如常演唱會」於昨晚假旺角麥花臣場館舉行，全場爆滿。身為主人翁的吳林峰除了特意藉今次演唱會毫無保留地與樂迷重溫由街頭唱到麥花臣的神奇之旅，他更特別請來生命中兩位重要的男人—許廷鏗（Alfred）及柳應廷（Jer@MIRROR）擔任嘉賓，見證他的首個個唱。

吳林峰甫出場便以〈街燈〉及〈梅利號〉炒熱全場氣氛，樂迷也興奮得跟著拍和。心情極度高漲的吳林峰然接著唱出盧凱彤〈卡嚓〉，唱得興起更走落台與觀眾作近距離接觸，打成一片。身為唱作歌手的吳林峰，返回台上即拿起結他，自彈自唱Ed Sheeran〈Lego House〉後，便唱出一系列由他作曲的作品，包括：陳柏宇〈純白〉、Edan〈小諧星〉的demo版本〈我的不夠完美〉、吳嘉禧（Cheronna）〈逐步拾回自己〉，全新的演繹方式，為幾首歌曲帶來全新的感覺。

唱過自家創作作品後，吳林峰突然在台上大嗌：「我真係好興奮呀！你明唔明呀？我七年前喺街同自己講要開自己嘅Show，我講咗七年喇！」台下樂迷聽到後即報以熱烈的歡呼聲，令吳林峰自豪地說：「今晚個場我嘅！好多謝大家今晚嚟到，冇諗過可以開到一個自己嘅Show。其實我琴晚（前晚）都驚緊，驚咩呢？我都唔知驚咩，總之就係好驚囉！但真係要多謝大家記得我係一個唱歌嘅人。」然後他分享了過去在街頭Busking的小事，道：「諗返起Busking有乜特別嘢呢？就係有一排啲人好鍾意唱Rap，我好唔忿氣，於是我都練咗一首Rap。」然後吳林峰便唱起C君@農夫〈偉大航道〉，以及昔日他經常會揀來唱的周國賢〈地下街〉及Supper Moment〈風箏〉。

唱過〈風箏〉後，吳林峰在台上道：「呢首歌令我認識咗人生中好重要嘅伯樂，嗰段時間已經唔諗住繼續唱歌，因為總覺得唱嚟唱去都喺街，唱嚟做乜？寫歌寫咗一堆喺度，但又冇勇氣俾人聽我嘅歌，直到有次Busking唱過〈風箏〉，然後有個人開Live，我係透過Live認識咗佢，佢亦要咗我人生第一首寫俾人嘅歌，然後就行到而家，所以呢個人對我好重要，我當佢係阿哥一樣，佢就係許廷鏗。」此時Alfred現身台上，二人合唱了吳林峰提到的第一首創作給別人的作品〈雪糕〉。一唱罷此曲，Alfred即窩心地為吳林峰抹汗，但卻邊抹邊搞笑說：「其實抹唔到喇喎，我驚個妝會落咗。」台下樂迷聽到即笑得合不攏嘴，但Alfred即說：「呢啲Bromance，識咩吖你哋！」

搞笑過後，Alfred即感性向吳林峰道謝，說：「你頭先話嗰陣你唔想唱歌，其實我睇你條片時，正正遇上咗我自己唱歌唔好聽嘅階段，跟住聽到你把聲，令我諗起以前啱啱玩比賽時嗰種純粹，而唔係諗緊呢隻歌有幾多點擊，多唔多人聽呢啲嘢，所以對於我嚟講係惺惺相惜。今年年中我唔知自己係咪可以做到一隻獨立發展後推出嘅作品，係有擔心過，但佢係其中一個話：『阿哥，如果你有咩需要，唔好怕麻煩到我，即管出聲，幫到一定幫。』所以我好想喺呢度多謝吳林峰。」互相感激過後，二人即合唱了另一首吳林峰為Alfred寫的作品〈痛〉，一唱一和的融和與合拍，令人聽出耳油。

再度單人匹馬站在台上的吳林峰，提到了自己刻板的創作生活，但卻表示自己愛在重覆的生活模式中發掘小事成為創作靈感，隨後他便唱出〈巴士光年〉及同樣以小事為主軸的RubberBand〈Easy〉，而向來重情義的他，今次首度開唱亦履行了承諾，帶同昔日一同在街頭夾Band的隊友演出，眾人更借這次難得的機會，合唱了共同創作的〈搭叮叮〉。

唱過〈大半生愛人〉、未曾公開作品〈抱憾〉及陳奕迅〈歌頌〉後，第二位嘉賓Jer@MIRROR登場，並與吳林峰合唱〈狂人日記〉。吳林峰唱完便透露，他是懷著不忿去寫這歌，因為他與Jer打電玩遊戲FIFA卻半場輸了八分，不過昨晚與Jer合唱後，才發現原來這首歌真的很難唱，所以他說：「為咗表達我嘅歉意，我會寫得再難唱啲。」話雖如此，吳林峰坦言Jer是他的學習對象。「佢明知啲歌難唱，但都會話可以高多個Key，然後練到得為止。」分享過對Jer的印象後，二人便合唱了另一首吳林峰為Jer寫的〈迴光物語〉，令全場氣氛推上了高峰。

在唱過〈一切安好…?〉、〈越壞越強〉、〈感謝曾出現在我的生命〉（未公開作品）及國語歌陳奕迅〈多少〉及盧廣仲〈大人中〉後，吳林峰唱出今次演唱會同名作品〈明天一切如常〉及〈下一束光〉後，演唱會便告一段落，不過樂迷瘋狂的歡呼聲及Encore聲，令本身已對舞台依依不捨的吳林峰再度上台唱出出道作品〈你是萊特〉，但熱情的樂迷此時仍是不願離去，本身已落台的吳林峰惟有再次上台感謝樂迷的愛戴，並揮著手高呼道：「走先喇！係咁先喇！下次再玩啦！」「吳林峰 明天一切如常演唱會」才正式結束。