尋找跑會的故事 #16 | 馬拉松訓練中心．痛擊死神之最強兵器 | Fitz

由馮華添教練 (添Sir) 所創立嘅跑會，毫不掩飾硬橋硬馬直接命名「馬拉松訓練中心」，嚟得呢度就係要學跑馬拉松，旗下門生過千，年齡層由廿幾歲後生仔女以至年屆花甲嘅老友記，肯肯定有料到。

學跑馬拉松之餘，跑步仲教識你啲乜? 十之八九答你學識堅持，但點解要堅持? 到底堅持啲乜? 要堅持幾耐? 自懂事以來，被耳提面命讀書要堅持返工要堅持生活要堅持做人要堅持，大佬，連工餘跑個步都不斷提你堅持同埋堅持，幾時先可以唔使堅持hea番陣? 關於堅持，相信由添Sir主講，無出其右。

廿多歲便開始接觸馬拉松嘅添Sir，雖已60有多，但仍體魄強健精神抖擻，談吐不慍不火且略帶幽默，屹立跑壇數十載，由佢所調教出嘅sub 3跑手多不勝數。拜訪過不少跑會，明白各家各派點樣教自有一套，但最終怎也離不開「堅持」二字，唯添Sir令人臣服之處係用自身條命作示範，其個人經歷比大部份sub 3教材更富啟發性。

命運就算再曲折離奇，相信誰也沒想過自己會先後患上血癌及肺癌，添Sir當然亦始料不及，更猜不到嘅係佢最終憑藉無比意志與信念成功兩次擊退癌魔，即使化療期間仍堅持繼續教繼續跑，兼以人辦姿態作教材，出書以自身遭遇去鼓勵更多人跑步。跌低起返身只係基本嘢，現以完成人生第二輪六大馬為目標，辛苦? 跳船? 放棄? 頂唔順? 面對一個擁有如此經歷嘅跑步教練，你好意思揸流灘?

人生嘅覺悟，當然無可能嘢嘢去到同死神面對面攤牌方能被激活，奈何生活中嘅挫敗人生中嘅挫折總係排住隊嚟招呼你，要活得實在，堅持似乎係最強兵器，咁到底係跑步呢回事成就堅強意志，還是需擁有鐵一般意志才適合跑步?「我唔會揀學生，快同慢我都會教。既然視障和傷殘人士都得，點解你唔得? 成功可以複製，只要你相信自己!」連死神都唔係佢對手嘅添Sir所講嘅呢番說話，毫無反駁餘地，完勝!

添Sir嘅經歷幾近「堅持」之極致定義，對一般人而言未必能馬上大徹大悟，「咩跑會咁巴閉」嘅拍攝工作，場景大多於港九新界運動場內，自己每次皆驚歎如此多跑友收工後仍精力充沛嚟到衝衝衝，為減壓? 追目標? 社交? 想必各有原因。無可否認，田徑場確實係一個頗神奇嘅地方，話大唔大話細唔細，嚟到嘅人可以係三五知己可以係三唔識七，心情各異但又不約而同咁做緊同一件事同一套動作，有人笑容滿面有人滿懷心事，神奇嘅係跑步似乎係解憂百合匙，俾老闆X完去跑步、俾客投訴完去跑步、同另一半吵大鑊後去跑步、無節目去跑步、無所事事去跑步，跑完問題唔會消失，但有助讓大腦清空、心情放鬆、注入正能量，不致容光煥發但肯定舒筋活絡，如釋重負般出一身汗，行步路都輕咗，輕輕鬆鬆回家去，翌日瞓醒又一條好漢面對新一日，我哋唔會知死神幾時嚟敲門，但起碼我哋要以最強兵器迎戰。