鄭裕玲(Do姐)近年在電視圈不算活躍,相反每星期一至五都會主持903電台節目《口水多過浪花》。Do姐早前為拍旅遊節目而請假,今日「回歸」電台開咪,一向少為政治事件表態的她,在節目一開始就已經哽咽。
Do姐今日於《口水多過浪花》一開始便說道:「喺過去兩個禮拜,我就(哽咽)去咗第二度,係為咗拍我一個節目,但係呢喺當時,我哋收到好多關於香港嘅消息,睇到好多好心痛嘅場面,尤其是我哋香港嘅學生同埋年輕人。呢兩個禮拜其實我哋去咗好多地方,要坐好多車、好多飛機。但係最後嘅一程,就係我哋最盼望嘅一程,因為嗰程係飛返香港,香港係我哋嘅屋企嚟。發生咗好多事,屋企係最緊要……(哽咽)I'm sorry,可能I’m getting old,好emotional(情緒化)。」
「我哋要珍惜呢個屋企,同埋尤其是我哋嘅年輕人,同埋學生。我好希望香港可以好快回復返平靜,我哋和平相處嘅狀態。當中我和迪偉(余迪偉)傾過偈,我同佢講,其實我覺得呢,我係一個娛樂人,喺一個咁崩緊嘅狀況之下,我覺得我應該做返我嘅責任。」
「《口水多過浪花》係一個娛樂、開心嘅節目,喺一個咁嘅氣氛之下,其實我哋應該發揮我哋自己嘅作用。我相信有好多人有好多嘅情緒,就算係我哋呢兩個禮拜去咗咁遠嘅地方,都好多情緒嘅牽動,希望我講完呢番說話之後,我哋可以令到人喺呢個半鐘頭,鬆返少少、開心返少少,我就覺得係盡咗自己今日嘅責任。」之後Do姐提議去歌,播放周國賢的《陽光燦爛的日子》。
Text:機