等了又等，等咗成年，到7月初終於播《仇老爺爺》。上套劇《教束》嘅大結局氣勢強勁，《仇老爺爺》頭三集似乎有啲接唔住。不過喺套劇播之前，唔只一個人同我講「游學修得呀」、「我相信游學修掂呀」、「游學修好叻」。
同一套劇嘅台前幕後咁講我就會有保留，但講呢啲說話嘅人係完全唔關套劇事，而佢哋都應該冇睇《仇老爺爺》嘅全片（游學修喺套劇播到尾段時，先交大結局嗰集畀ViuTV）。我嗰時諗，點解佢哋對游學修咁有信心呢？但睇完《仇老爺爺》，我諗我明點解佢哋咁有信心喇，以後當人有懷疑時，我都會同佢哋講句：「喂，游學修係得呀，佢掂呀。」
問：《仇老爺爺》係幾時開始寫劇本？當時有咩觸發你以「廢老VS廢青」作為劇本題材？想透過《仇老爺爺》講啲咩？
答：嗰陣時度緊一個完全同依家唔關事嘅故仔，只係諗諗吓諗到一個處境，就係一個素未謀面嘅老人家要同你一齊住，其實係一件幾麻煩嘅事，應該有啲好有趣嘅嘢發生。咁就開始develop落去諗有啲咩有趣嘅事發生。如果嗰個係你阿爺，咁點解你阿爺會咁耐都唔搵你呢？一路去慢慢諗呢啲問題，去建構呢個故仔，同埋點樣去擺兩個點樣嘅人物一齊先有一個有趣嘅故事，係咁樣開始。
好多人都會問，個故仔係講咩？係表達啲乜？《新 Monday》係第一個 post 嗰段《大鬧關愛座》嗰場戲，佢一日有萬八個like，好似百幾萬view。好多人鬧廢青呀，有啲拉埋去政治度講。我係覺得好有趣，因為同部戲係同步咗，然後就覺得《仇老爺爺》係搞分化，係好有趣。至於係要表達啲咩呢？其實「關愛座」係有3.5場戲，基本上我要講嘅嘢就喺嗰3.5場戲裡面講晒。播完大結局之後，我會出個post去講。
問：你喺訪問提到「廢老」係「同時代脫節，但又企出嚟做好多行動、講好多嘢，而覺得自己係啱嘅。好多時會喺自己嘅利益角度出發」。對於「廢老」呢個term，你仲有冇補充？你覺得「廢青」係咩呢？
答：「廢老」如果要補充嘅話，戲裡面都有呢句對白：「你年輕就係唔叻」。我真係聽過一個前輩咁樣同我講。嗰陣時佢度緊一套戲，係講年輕人係有幾廢有幾廢，咁就搵咗我一齊度，咁我度度吓唔舒服，就同佢講：「你驚唔驚啲人話你呢套戲係抹黑後生仔呀？」 咁佢就話：「我唔覺喎，後生仔廢係應該喎。」佢講真嘅，唔係講笑，「後生仔就係廢啦，邊個後生仔唔廢啫？」佢已經將呢個變成前設：後生就一定廢。我覺得「廢老」都係有呢一個特質，就係「年輕就係一定比我差，一定係唔叻」。好慶幸最後個故仔冇拍到。
「廢青」嘅定義，我會將佢分狹義同廣義定義。狹義定義就係你唔上進、一事無成，真係好廢，即係廢柴啦，廢柴嘅年青人。之後，後生仔畀人鬧「廢青」鬧得多，就拎咗「廢青」呢個字嚟自嘲，就出現咗「廣義」嘅定義，佢哋係喺金錢同成就上暫時冇乜成績，但其實佢未必冇能力，係因為個社會、個system令到佢哋冇得向上爬，喺成就上好廢。呢個就係廣義上嘅「廢青」。
「廢老」、「廢青」最大嘅問題係佢哋兩個generation好難溝通，因為大家都覺得對方有問題，而大家又唔會站喺對方嘅角度去諗。戲劇就有呢個魔力，我就係建構咗呢兩個素未謀面嘅爺孫，佢哋喺套劇二十集嘅旅程，逐步逐步去設身處地喺另一邊去諗。喺現實中呢樣嘢係近乎不可能。所以喺現實當中去應付廢老，我都係避之則吉，或者聽完就「哦哦哦」就算。我覺得要用行動回應，當你真係做咗啲好嘅嘢、講咗啲好嘅嘢，喺嗰個時候拎個作品、成績出嚟，就自自然然可以代表到。
好多時溝通係溝到唔到，因為大家都唔聽。所以做啦，用行動代替溝通，去做個表現出嚟。
問：你覺得自己了解「廢老」定「廢青」多啲？ 做咗咩功課去了解呢兩個「對立」嘅群體？
答，我諗「廢青」都唔係好使點做功課喇，因為我自己、我身邊全部都係「廢青」。咁「廢老」呢，係取材自唔同嘅「廢青」屋企裡面嗰個「廢老」囉。
撰文：方以文（ig: fongemantvman）