吳冰妹妹涉介入健身教練婚姻　小薯茄發聲明：不牽涉公司成員

小薯茄吳冰（阿冰）的妹妹吳泳今日（2月25日）凌晨被指介入網紅健身教練William的婚姻。William的太太「FaFa Tse」在社交平台連出多個限時動態，並標籤小薯茄成員吳冰爆料。FaFa出文出片，指自己昨晚本打算回健身室踩機，但最後卻變成「捉姦」，對象更指名是吳泳。其後，FaFa再爆出疑似是老公及吳泳的色慾短訊。

William和FaFa Tse去年11月結婚，當時小薯茄成員亦有出席婚禮。FaFa今日凌晨出文配圖，拍到在辦公室有一名裸體女子躺在地上，配上文字：「我老公偷食小薯茄泳泳。」另外還有疑似William和吳泳的對話截圖，當中有人提到：「今晚先同你算脹（帳）。」而捉姦影片中則見到FaFa闖進一辦公室，地上都是衣服，之後見到其老公由上層走下來，還有一名女子在現場。另一影片FaFa拿起地上一條牛仔褲說：「上PT唔洗著褲？」再寫道：「同小薯茄啊冰個妹搞野（嘢），今次第3次俾我捉姦，衫都無著。」

「FaFa Tse」今早再出限時動態：「事件發生左（咗）8小時，交代全件事。我11點同朋友house warming 完，打算返去我地既（嘅）健身室踩機去到門口禁（撳）鐘（我平時懶用鎖匙），等左（咗）好耐無人開，聽到佢由閣樓跑落黎（嚟），開門一刻啱著緊衫。本身佢話fu哥肥man上緊堂，我問人呢？個刻我未feel到。直到佢抖大氣，唔出聲，樓梯有條無著嘅女裝褲，我問上面係咪有人？佢話：泳泳同肥man，唔好上去啦！我問：點解？佢話：佢哋high左（咗）大X。我話：點會啊！佢哋二（兩）個一定唔會（其實你點解要連累人？）佢話：唔好上去。唔好做任何野（嘢）我地（哋）未做未開始。我而家打字都仲手震，全個身都震，你目睹心愛既（嘅）人同另一個女人裸體訓（瞓）係（喺）到，仲要講句：未開始。個感覺難受過食屎。期間我問William：發生左（咗）幾多次？第幾次呃我？佢話：未開始　我話：到尼（呢）刻仲講大話？佢話：3次 #期間小三係（喺）我哋側邊裸體繼續訓（瞓）收到好多dm，感謝你地（哋）。幫我鬧賤男，幫我爭返啖氣。我真係好無助好崩潰，當中好多內情我唔敢公開。我忍，尼（呢）次最後一次對你好。再也不見」。之後「FaFa Tse」再出story並標註吳冰，指「完全搵唔到你個妹」，指責她「你帶過嚟但又唔理佢三觀不正嘅事實」，最後又透露「仲有勁爆嘅事」。

小薯茄今日約中午時分在社交平台發聲明：「首先謝謝大家關心，本公司與旗下所有成員同樣透過報導才得悉事情，亦立即與該健身教練終止個別成員的贊助合作，就事件為公眾帶來困擾和影響，我們感到抱歉和遺憾。鑒於網上出現有關本公司及旗下藝人的不實消息，本公司認為有澄清之必要。本公司及成員對事件並不知情亦不認同，在此嚴正聲明，對於坊間誣蔑參與或涉及任何違法行為更屬無稽，本公司將保留一切法律追究權利。」

「基於事件不牽涉本公司成員，以及涉及他人私隱，我們及後將不會對事件作任何回應，謝謝大家的關心和體諒。今後，小薯茄將繼續努力如初，專注於我們的工作。最後，我們再次對事件造成公眾困擾致歉。由於事件中所牽涉非公眾人物，事件亦屬私人事件。我們衷心懇求大家能給予有關人士適當的處理空間，也不希望事情繼續佔用公共資源。謝謝大家的關心與諒解。」