世界盃過後，三笘薰彷彿迎嚟進化。足總盃對利物浦，三笘完場前接應傳中，一挑一射，時間彷彿為佢而靜止，技術滿分之餘絕殺對手。
現今球壇常見嘅逆足左翼，三笘具備速度同盤扭技術。比其他球員唔同嘅係，佢大學主修運動科學嘅畢業論文，係以自己嘅盤帶動作做例子，研究盤帶技巧。喺學術上嘅研究，幫助到佢快速理解更多動作，配合平時日以繼夜嘅訓練，能夠令佢喺以過人嘅知識基礎，作出更快更好嘅實戰反應。
結束借用後，今季三苫薰回歸白禮頓，屢屢交出好表現，甚至喺世界盃創造出1.88mm壓線助攻嘅經典畫面，返到英超之後更加大爆發。要創造呢啲時刻，佢嘅技術固之然重要，但更重要嘅，係佢嘅意識已經跟得上歐洲主流聯賽，甚至國際大舞台嘅水準。
上半季嘅三笘已經喺有限嘅上陣時間之內顯露出實力，但佢門前表現唔算亮眼，甚至大部份比賽都冇作出射門，原因係喺一啲可以終結進攻嘅play，佢嘅用球傾向先搵隊友。當然咁樣代表三笘球風唔自鬼，但變相會浪費咗一啲易食嘅chance。返返日本隊之前，三笘只有世界盃前最後一場有份上陣嘅英超比賽，對狼隊射入聯賽開齋一球。
而呢個情況，喺世界盃完結之後完成逆轉。英超開季之後，三笘每場比賽都有嘗試射門，5場聯賽入3球，另外喺足總盃絕殺衛冕嘅利物浦。
目前白禮頓以31分排名英超第6，佢哋今季走咗比素馬、慕比、古古利拿等等嘅主力球員，但成績比上半季好得多。領隊樸達為球隊注入更多主動進攻嘅元素，收緊陣容嘅密度，令以麥亞里士打、卡些度為首嘅中場核心，同其他球員建立更緊密嘅連繫。而繼任嘅迪沙比，領軍下延續樸達嘅改變，佢重用三笘薰嘅決定，更加令球隊、球員雙雙得益。
班主布隆上任後，白禮頓球探部門加重數據分析嘅成分，轉會看重成本效益。當初僅以£2.6M就加盟，三笘本季給白禮頓帶嚟嘅貢獻，肯定物超所值。當然，衡量一個翼鋒效率嘅時候，入球數唔係最重要嘅指標，但佢創造出嚟嘅威脅，加上近日漸入佳境嘅入球數字，令三笘慢慢進化成為一個傳射皆精嘅翼鋒，身價未來可預見會翻倍。
留言 0