保安局為咗改善收押所設施老化同環境過度擠迫嘅問題，提出重建荔枝角收押所，立法會工務小組委員會今日通過建議。之不過多名議員關注重建項目涉及55億元，經民聯議員龍漢標話，就算扣除「智慧監獄」元素嘅費用，重建造價都好高，每平方尺建築費同起五星級酒店價錢差唔多。選委界議員何君堯亦都話，香港而家有過千億赤字，唔可能起「五星級嘅監獄」，令到囚犯一入去就唔想走。佢又話收押所重建之後會有牙科診所等設施，形容出面都冇呀，喺監倉仲有條快隊，係對囚犯「太好服侍」，直斥重建方案離譜。
何君堯批評獄中設施
何君堯幾乎每個設施都批評，包括喺獄中設立宗教設施，話囚犯做錯咗要悔改，搵個角落頭自己檢討就得啦。佢又提到設立籃球場、排球場同埋室內運動場，話搞搞下立法會設備都冇咁靚呀。至於設立親友室同探訪室，何君堯話提供咁多探訪機會做咩啫，平時都唔見，坐埋屋企一張枱食飯，都唔會望佢啦，都係打緊機或者WhatsApp緊，佢批評官員廿幾萬人工「諗啲咁嘅嘢出嚟」。
何君堯更加話荔枝角收押所有集體回憶，話黎智英同戴耀廷咁多人坐過落去，「有龍又有鳳又有烏蠅又有老虎乜都有」。佢舉例澳洲有坐監旅遊團，建議香港參考，宣傳「原來呢個戴耀廷坐過嘅」。
局方指造價難以同五星級酒店比較
保安局副局長卓孝業回應話，同意造價觀感好高，但重建中有30%用地係診所，包括興建負壓隔離室、手術室等設施，亦要提供適切嘅探訪室同等候空間，並有20%用地作行政用途。他又話收押所保安要求高，間隔要求較密，同一般居住設計有分別，造價難以同五星級酒店比較。另外，卓孝業又話「智慧監獄」系統費用佔為數約10億的家具和設備開支53%，當中會包括用機器人巡查、檢測生命體徵等，但部分工作唔可以取代人手，例如跟進檢測結果等。
原文刊登於 AM730
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)
