MIRROR新團歌〈RUMOURS〉上架 首支全英文單曲MV有香港特色景

男團MIRROR昨晚首推英文單曲〈RUMOURS〉，12位成員集合拍MV衝出香港，而且當中更特別揀選具本地特色的背景，包括舊式理髮店、天際100(sky 100)以及香港大球場拍攝。新MV上架半日吸到超過18萬Views。

今次〈RUMOURS〉主題是情歌，隊長Lokman說：「好簡單，追女仔，用『Rumours』一字，就係想問你，有冇聽過關於我對你嘅謠言，我有少少鍾意你，成日幻想住你，好簡單直接嘅內容。」AK則提到新歌有國際級人馬製作：「〈RUMOURS〉搵咗曾與BTS合作的音樂人作曲，監製Edward Chan揀呢首Demo係好有型，同我哋之前嘅曲風有少少唔似，內容上亦係第一次講兩性關係嘅Topic，作為第一隻英文歌，係幾新鮮。」還有一位Vocal Coach(聲樂教練)Andrew不斷幫他們執口音。

姜濤發現：「特別聽到每個人唱英文嗰把聲，同平時唱廣東歌有分別，聲底會有唔同，我個人好鍾意Ian唱英文歌時把聲，比較自然。」Anson Lo則開心道：「出道以嚟都未試過錄咁多英文字，好好玩！成個錄音過程好新穎，因為過去只有Edward監，今次加上Andrew，成個Vibe認真得嚟加咗一點搞笑，因為每錄一句，Andrew都會讚你一句，佢係錄開國際音樂嘅人，俾佢讚我英文好，令我好自豪。」
Jer亦感激Andrew的幫忙，他說：「佢喺美國有時差，每次都係凌晨4、5點起身幫我哋，好似未瞓醒咁，呢個係有啲好笑，但好開心可以同到佢合作。」

Frankie說：「第一次Online錄歌都幾新鮮，Andrew好俾信心我哋去錄，感覺好舒服，同埋令我覺得出嚟成品係好正！」Jeremy則有點緊張：「第一次錄英文歌好緊張，因為要錄英文咬字，喺Andrew教導下係好啲嘅，希望我哋唔會失禮大家啦！」Alton在錄音後有所領會：「我哋唱廣東歌時，可能會著重字正腔圓，但今次唱英文，Andrew會同我哋講Flow多啲，咬字唔使好死，呢啲都要學習過後先知道。」

提到拍攝場景，Tiger說：「我哋去咗彩虹邨一個好舊嘅理髮店，好啱拍攝用，加埋啲燈同煙，所有嘢都好有味道。」Edan也說：「好有香港風格，好有舊色感覺，喺嗰度主要拍一啲劇情，講述我要看住Mandy，但佢突然唔見咗，然後就有接續嘅劇情發生。另外當中有一幕係望住Lokman同Alton夾住Mandy入嚟，但大家都忍唔住笑，因為Mandy太高了！」

對於新歌期望，Jeremy說：「希望可以從香港可以踏上韓國嘅舞台。」Stanley則平常心面對：「其實冇話分邊個語言，當我哋又出多首歌囉，我哋冇話要進軍海外，然後有好大壓力，我哋只係想做好作品，又未試過英文歌，咪試下，可能下次試下普通話歌都唔定，只係多一個唔同語言嘅作品，唔理任何語言，呢首歌係真係好聽，咁多首團歌之中，我係幾鍾意〈RUMOURS〉，排第一，希望我哋鍾意嘅同時，大家又鍾意啦！」