政Whats噏︰議辦被毀唔整住　張國鈞想畀街坊睇示威者罪證

身兼中西區區議員嘅立法會議員張國鈞（Horace）喺西環山市街嘅議員辦事處，前晚(3日)受到示威者嚴重破壞。中西區區議會副主席陳學鋒尋日(4日)就引述Horace話，個議辦有兩塊玻璃爛咗，依家唔諗住整番好佢，會維持原狀一段時間，目的係想畀人知道原來遊行示威會帶嚟幾咁野蠻嘅威力，亦作為示威者嘅罪證。

Horace自己亦喺社交網站貼文話收到唔少市民關心同慰問，又話因為港島區好多個地方仍然衝突未息，因此再三叮囑大家要注意人身安全。佢話呢個議辦係為西環區居民提供地區服務嘅，要嚴厲譴責破壞嘅人，但強調摧毀唔到佢服務市民嘅意志。由於佢無咗個辦事處，所以話會向其他團體借場，以便繼續為街坊服務咁話喎。

東網網站 : https://on.cc/

東網Facebook專頁 : https://www.facebook.com/onccnews/