在繁忙中迎來「Mic Drop」的第一次訪問。究竟應該如何寫起？第一位訪問的嘉賓是數年前已經認識的 Novel Friday。 坦白講，現實中怕生的我，與一眾 rapper 朋友頂多泛泛之交， Friday 也不例外。機會難得，就讓我跟KKBOX 樂迷一同窺探，一眾 rapper 創作背後的段段故事～
Novel Friday 的名字，原來源於在學時期。「我係畫畫先嘅。當時喺 Facebook 開咗個相簿叫做 Friday Sketch，每個禮拜五畫吓畫⋯⋯後來有師兄話，你要出 Rap 喇喎，係咪要有個 Rapper 名？當時覺得自己寫歌好似寫緊故仔，寫緊小說，就不如叫 Novel 啦，Novel Friday，幾順口。」十八九歲的他在學時修讀設計，當時學院的說唱學會橫空出世，覺得有趣的 Friday 沒有多想就加入了。自此，同一支筆，除了畫畫，也漸漸開始寫歌，後來一眾師兄弟自組 PPC Records，以自負盈虧形式製作音樂，直到去年加入本地廠牌 Greytone 至今。
新一代談論音樂創作的風格，的確很難將創作歸為單一類型。回溯早期創作，Novel Friday 常受 Post Malone 啟發。做資訊搜集時仔細聽其 Mixtape 作品，發現 Friday 早期已經對聲音運用有一定掌握。「我覺得做 mixtape 時，都未至於（很了解自己聲音），大概知道自己可以做啲咩 Vibe。直到加入 Greytone 先開始 Study 真正嘅音樂係咩。」一開始，Rap 於他而言，充其量是個工具，節奏明快，可以很簡單。但後來再發掘文化，聆聽更多 Hip Hop 音樂，再思考創作的可能性，發現除了旋律性說唱外，還可以有其他嘗試，例如 Acoustic 味重一些，又或佐以搖滾風格， 如何定義自己的風格？他躊躇半秒，一言敝之：「Friday’s style?」
Novel Friday 作為港泰混血，提起身份，旁人總愛說「講兩句泰文嚟聽下」， 所以今次就不為難他了。他在其他訪問曾提到，雙語思維影響著他的廣東話 Melodic Rap（旋律性說唱）創作。「（會泰文對創作的影響）不是次序， 而是音樂性。如果好認真寫廣東話 Melodic，會 Trap 住咗喺嗰粒字啱唔啱音，成件事、成句嘅組織結構，係唔係好傳統嗰種。」
同為創作人，深深明白 Friday 所講的執著，廣東話本來的聲調，很多時候限制了創作者對於曲詞的想像， 若過於咬文嚼字，經常會在同一份作品裡無限輪迴甚至無疾而終。「每個人對聽感嘅 Aesthetic 都唔同，以前不斷搵個標準係點，聽好多前輩作品⋯⋯ 但最後都係要搵一個自己舒服嘅創作（模式），咁先搵到自己。」經過四年摸索，在模仿之後始終要主動創出屬於自己的風格，音樂亦然，時尚打扮亦然。
「喺 PPC 嘅時間開始 Study（Fashion），因為都會睇好多 Rapper，每個 Rapper 都有自己 Style，最容易令人記得係佢嘅 Outfit，佢（身上）著緊啲咩。到真正諗深一層，了解多咗⋯⋯我覺得做 Artist 就係著上身，全身嘅嘢都可以係藝術嘅表達。」語畢他如數家珍，由手繪第一雙品牌贊助的球鞋， 到美之尋寶覓得 90 年代 Rave Party 閃閃褲，再到頸項上戴著的多條金鍊，其中一條的吊咀是特別訂製的 PPC logo，每件都裝載故事。爾後，Friday 突然離席為我送上一件個人品牌「Friday Is A Mood」Tee 恤（多謝！）意圖騎劫本欄，實在剎本人一個措手不及。
穿金戴銀又 Bling bling，是在 Flex（炫耀）嗎？「我係 Dress，不是 Flex!」帶點引戰意味的疑問卻引來妙答:「有幾多我咪著幾多上身。好多人買啲炒款，我OK嘅，但我覺得重點係嗰樣嘢擺喺你身上有無凸顯出你，如果著到全身名牌啲人都睇唔到你，就只係跟緊潮流。」
在音樂與時尚中悟出的道理似乎殊途同歸：找到屬於自己的風格，才能確立自己的位置。加盟 Greytone 後，有了資源配套，也不再愁白交租，Novel Friday 得以專注創作，順利產出收錄 19 首新歌的大碟《在陽光底下》。
「（新專輯）歷時做咗一年三個月，紀錄不同季度，有不同感受。」Friday 說新專輯約略以感情、抽象書寫與個人思維三分，紀錄在陽光底下吸收養份再成長，一棵抽出嫩芽的自己，初探世界之大，破土而出的感受。同名演唱會將於 8 月 6 日在 Music Zone 舉行，作為第一場個人演出，Friday 最為重視的，是 Live Band 表演形式，諸君請拭目以待。
「在陽光底下」，又意味著反正一切皆已「見光」，與其不斷排斥舊我，不如坦誠地交出過去的自己，經歷音樂作品的搗碎與重建，再次拼湊、完整自己。誰說日光之下並無新事？Novel Friday 選擇以音樂回應。
留言 0