【搵食CONY】中環隱世高質星馬菜　特色咖啡骨、魔鬼魚

近年愈開愈多星馬菜餐廳，但以街頭美食為主，如果想坐得舒服一啲，慢慢同朋友傾偈品嚐嘅就比較少見，而於去年尾新開嘅「獅城」可算係例外。餐廳位於中環蘭桂坊樓上舖，位置旺中帶靜，雖然舖位唔算大，但總算企理舒服，最重要係可以嚐到一系列正宗星馬菜，由最為人熟悉嘅肉骨茶，到坊間少見嘅咖啡骨、魔鬼魚都有齊。

餐廳名字「獅城」簡單直接用上新加坡的外號命名，而菜式方面就以新加坡和馬來西亞的小菜為主。由於星馬地區大多近海，因此食材多採用海鮮，而且當地深受其他東南亞國家和中國菜式影響，醬汁多以中式調味料與東南亞香料揉合起來，形成獨特卻同時為香港人容易接受的風味。

星馬特色菜

在眾多菜式之中，CONY首推「咖啡骨」，呢道星馬名菜喺香港唔係度度有得食，醬汁主要以咖啡粉和糖調製，配搭外脆內嫩嘅一字排，香濃嘅咖啡汁同豬嘅油脂香氣好夾，而且能平衡排骨嘅油膩。另一道同樣較少見嘅「醬燒魔鬼魚」，以魔鬼魚翼塗上秘製參巴醬燒烤而成，一梳梳魚肉能輕易夾起，肉質細嫩，而由於醬汁混合咗馬拉盞，因此微辣而帶蝦香，相當惹味。

獅城咖啡骨$158：大廚特意選用較厚身嘅一字排，食起來啖啖肉，與咖啡汁味道融為一體。

必食傳統菜式

除咗特色菜，當然要試埋其他耳熟能詳嘅傳統星馬菜。「巴生肉骨茶」用上十多種香料煲3至4小時，偏向馬來西亞嘅藥材湯口味，而非新加坡式嘅胡椒湯，並跟隨古法加入多種食材，除咗排骨，仲有豬踭、大腸和五花腩，十分足料。另一道菜「星洲麥皮蝦」雖然坊間較常見，但呢度做法略有不同，以牛油、蒜蓉、咖哩葉等香料爆炒過後再加入預先調味好嘅麥皮，最後加入炸好嘅大蝦炒勻，唔會好似坊間咁為咗令麥皮掛在蝦上而加入煉奶，因此味道更香濃惹味。