印傭控男僱主性騷擾　庭上播男聲「工人就唔屌得㗎咩」　僱主稱對方「想引我犯罪」

一名印傭聲稱於 2022 年遭獨居男僱主性騷擾，包括多次被游說性交。她暗中錄下對話，當中一把男聲提到「想搵個好嘅工人姐姐同我結婚生仔」、「工人就唔屌得㗎咩」。平機會代事主入稟區域法院，索償逾 18 萬元，案件周二（13 日）開審。

男僱主庭上否認是錄音內的男子，指沒向事主提出性要求，又斥律師「唔好收人錢就生安白造」。他指，是事主提議以 2,000 元提供按摩服務「想引我犯罪」，惟他覺得很貴而拒絕，又指「我需要性生活好容易，落去荃灣有幾十個」。案件周三（14 日）結案陳詞。

申索人為印尼籍女傭，由平機會安排謝姓大律師代表；答辯人林銳生自行應訊，案件由區院暫委法官汪祖耀審理。

入稟狀：多次遭僱主遊說性交

入稟狀指，事主於 2022 年 2 月受僱於林銳生。同月某日，林在事主洗澡後走近，嗅其頭髮和身體稱「好香」，又指之前聘請的女傭願意作性交易，多次遊說她性交。事主拒絕林的要求，並暗中錄音。

事主其後報警及向平機會投訴，警方指事件未能構成刑事罪行，不會進一步處理，她終遭解僱。她指，林的行為構成性騷擾，令她受到侮辱及難堪，要求林支付共約 18 萬元的感情損害、收入賠償。

庭上錄音男聲：「有老公都可以」

開案陳詞、事主供詞以書面方式處理，林銳生出庭作供。林否認在事主洗澡後走近及嗅頭髮，「我（個）廳得百幾呎，佢出嚟成間屋都香晒」，但同意曾說「好香」，強調只是「我隨意講」。

庭上播放事主暗中錄下的兩人對話，林一度要求避席，指未能證明錄音中的男聲是他，「你夾硬要播，我唔想聽囉」。代表事主的謝大狀指，林申請法援時，已確認錄音中的男聲是他，林反駁指自己是「求求其其冇經過大腦，冇深思熟慮下簽咗」。

2022 年 2 月 21 日部分錄音內容如下：

男聲：有老公都可以㗎⋯我唔問你，點知你肯唔肯⋯好多人肯㗎嘛

女聲：唔可以咁樣㗎嘛先生，我有老公㗎嘛

男聲：想同你做朋友，咁你都明㗎啦

女聲：我唔明呀，先生要點樣

男聲：你唔明冇辦法，好多人都有老公，好多人都同第二個男人有感情

女聲：先生我唔得

男聲：之前姐姐未結婚嘅，23 歲，佢肯嘅

女聲：我好驚呀先生

男聲：我又冇掂到你，驚咩啫？你唔得咪算囉，你唔得冇計啦，因為我冇仔呀嘛，我想搵個好嘅工人姐姐，同我結婚生個仔⋯唔會貪人小便宜，我係正人君子

謝指，根據以上對話，林隱晦地向事主提出性要求。林強調男聲不屬自己，又指「你唔好收人錢就生安白造」。謝再指，他向事主提出發生感情、結婚生子的要求，林一概否認，並稱「希望你有啲專業操守、道德」。

庭上錄音男聲：「咁錫身唔好嚟做」

至於 2022 年 3 月 3 日部分錄音內容則如下：

男聲：屌你老母，返印尼耕田啦，喺度做愛囉，呢啲點同你公司講啫？幾十歲人諗都諗到做咩啦，使乜講到明啫⋯請你嚟呢度，睇到你個樣都靚啦，你唔知我要咩

女聲：我係喺度做工人呀先生，幫你掃地煮飯

男聲：工人就唔屌得㗎咩？

女聲：先生要 baby，先生結婚囉，唔係跟我瞓覺

男聲：孤男寡女點會唔知咩啫⋯屌你老母呀，谷鬼氣，咁錫身唔好嚟做囉，想同你搞呀嘛，你又唔係未搞過

謝大狀指，林以反問、間接方式，著事主配合性要求，又以開除事主，報復她拒絕配合性要求。林不同意，「我需要性生活好容易，落去荃灣有幾十個」。他指，會往荃灣接受性服務，包括手淫及按摩性器官。

謝又引述林的證人陳述書，稱是事主主動行近，提議以 2,000 元提供按摩服務，惟他覺得很貴而拒絕。林庭上補充，「佢忽然向我行前兩小步，我心諗呢個女人唔簡單，想引我犯罪」。

DCEO4/2023

《法庭線》報道全部免費開放，有賴讀者訂閱支持營運：
https://bit.ly/3LJeOzX
追蹤《法庭線》網站及各平台：
https://linktr.ee/thewitnesshk