近呢一年來，陸陸續續有政界人士移居海外，而佢哋通常要喺抵達彼邦之後，先至透過社交平台向外界交代自己身在異鄉。食物及衞生局前政治助理陳智遠，尋日(26日)喺社交專頁上載1張風景相，同埋留言話「當大家睇到呢個post(貼文)，我已經唔喺香港。」莫非移民潮之下，佢都選擇去外國開展新生活？
其實，陳智遠係同屋企人到城門水塘郊遊。按政府嘅區域劃分，城門水塘屬於新界，陳智遠話自己唔喺香港，狹義而言並冇講錯。而佢亦都有解釋，話自己喺新界、抄人橋，博君一粲咁啫。不過話時話，城門水塘向以景色優美著稱，尤其是每當水塘滿溢，同該處獨有嘅白千層樹所映照嘅迷人風光，睇落都有幾分似去咗歐洲㗎！
除咗城門水塘，陳智遠亦同家人到北區半日遊。其後佢好驚訝咁話，唔知依家啲小朋友喺邊度接受資訊，年僅6歲嘅囝囝竟然知道百年前九廣鐵路曾經有1條沙頭角支線，條支線仲有1個「孔嶺車站」仍然存在。而呢啲典故，佢要去到30幾歲先至知囉。
東網網站 : https://on.cc/東網Facebook專頁 : https://www.facebook.com/onccnews/
