呢個周末十大二手屋苑竟然只係得4宗成交，仲要係集中喺將軍澳新都城同天水圍嘉湖山莊呢兩個老牌自用屋苑。一手樓盤嘅銷售都唔見得好幾多，發展商手上嘅新盤貨尾單位已經超過1.5萬個，去到年底應該會突破2萬個，到時發展商一係唔減價，一減價就肯定會劈價，要錢唔要貨，到時二手樓嘅樓價就會拾級而下。
我曹老闆喺Bossmind呢度開專欄嘅第一篇文章，就係叫大家揸現金唔好買股票，如果當時聽咗我講，身家最少會多番兩三成。而家我就喺度叫大家如果想賣樓嘅就要趁快手，呢一季香港負資產嘅宗數已經比上一季多咗10倍，由50幾個個案升到500幾個個案。
後生仔女可能冇經歷過2003年沙士同2008年金融海嘯。香港樓價其實可以大跌七成，負資產宗數亦都會急升到過萬，亦即係呢一季嘅數字升多10倍或者20倍，美國繼續加息，環球經濟衰退，香港防疫限制，印花稅阻礙資金流入樓市，全部都唔係容易改變嘅嘢，負資產浪潮將會喺明年進入高峰，尤其係過去幾年用呼吸Plan上車嘅一族可以話係血本無歸。
仍然揸住現金嘅當然夜晚要食返餐好，早幾日同老友去中環嘅MASA，呢間就係廚師發辦唔使用腦等食好嘢嘅日本料理，人均幾千蚊落樓係正常收費，但係竟然要早兩個月訂位。嗰晚聽到大廚MASA年底要返日本家鄉，啲新知舊友全部捧場同佢道別，嚟緊仲會搞幾場VIP聚會，佢一晚只招呼8個客人，真係一位難求。
就好似稿費收得最貴嘅作者，其實係好少讀者。而可以立足中環料理界，MASA就係靠堅持同出品，淨係張長枱都要求冇駁口，食材亦都係朝早喺日本空運過嚟。呢啲另類專才點解香港留唔住呢？當然MASA大哥有佢自己嘅考慮，但係你睇吓而家樓市印花稅嘅措施，懲罰性咁抽喺香港置業嘅外國人重稅，又點會留得住佢哋喺香港生根呢？
施政報告只係放寬畀住夠七年嘅永久居民退回之前嘅印花稅，人生又有幾多個七年呢？新加坡住兩年就大幅減低外國人置業印花稅率。香港唔會有外國資金托下市，所以咪話而家唔賣樓，唔通等到樓價崩盤嘅時候先賣咩。
密切留意BossMind動向！立即CLS
