《東張西望》有新女登場,落選港姐何孟珊加入節目,唔少人都好期待佢之後嘅表現,仲令人忍唔住回顧一眾《東張》女神訪問時嘅經典場面添!
要講最出名嘅一定係咪神林泳淘啦,博到盡以比堅尼上陣去沙灘學玩水上瑜伽,大晒32D豐滿身材!之後佢又多次以緊身小背心出外採訪,盡展玲瓏浮凸Body,就連講市民都好關心嘅黑心疫苗都變成配角,觀眾都將重點放喺佢身上,仲有指節目收視因為佢而急升,唔少網民都話因為佢而睇《東張》,但泳淘已經離開無綫,一切都已成追憶喇!
不過大家又唔使灰心,皆因有佢嘅姊妹利穎怡接力,早前佢訪問為女還債借財仔搞到層樓都冇埋嘅苦主,以露肩裝上陣,但性感程度惹來爭議,有人批評佢太少布同暴露,令受訪者被忽略!佢事後就話睇到出街片段都覺得唔太恰當,感到非常抱歉,下次會多多注意,仲話件衫送埋畀人!而同一集嘅訪問,由於佢分開拍攝,之後嘅衣着就較為密實!
除咗呢2位,另一咪神李旻芳都曾製造唔少經典畫面,之前佢報道口罩短缺出現坐地起價情況時,雖然包到上頸,但貼身長袖衫令佢澎湃身材表露無遺,又試過以緊身白衫劈柴,令人印象深刻!而另一落選港姐阮嘉敏及黃穎君都曾成為焦點人物,前者以運動Bra喺郊野採訪被指太暴露,後者烏身訪問小朋友時,露出事業線更疑似走光!
東網網站 : https://on.cc/
東網Facebook專頁 : https://www.facebook.com/onccnews/