王浩信、袁偉豪靜雞雞過檔 無綫藝人紛紛離巢外闖轉投邵氏

時代變了，娛樂生態不同了，在各種因素下電視台近年爆發離巢潮。電視台小生花旦儲夠名氣同本錢想向外闖係必然，如何做生不如做熟、換個合作模式一樣可以拍無綫劇，但又更多機會拍電影和北上？過檔邵氏其實係個近水樓台，而又最多小生花旦嘅最後決定！

撰文、圖片：東方新地

李施嬅

去年四月，李施嬅宣布結束與無綫15年賓主關係，今年初又係靜靜雞登上邵氏官網藝人介紹，成為邵氏旗下藝人，六月仲即刻開工返無綫拍《 金宵大廈2 》。

胡定欣

年頭宣布不續約無綫，未來動向被連番猜疑，甚至被指將會轉投古天樂旗下嘅視后胡定欣，終於公布去向，正式展開與邵氏兄弟國際影業嘅合作。出 po 多謝樂小姐多年照顧，其實樂易玲都係邵氏執行董事及總經理，過咗檔咪又係跟番樂小姐。

王浩信袁偉豪

一般情況下，藝人尤其係視帝視后級，一旦加入邵氏必然大張旗鼓開埋記招，不過疫情影響下，大型宣傳活動都要謝絕，就連上個月兩大小生王浩信同袁偉豪加入邵氏，都係等到二人靚相出現喺官方網站藝人名單至被公開。

岑麗香

18年六月，香香以千字文發表感言，宣布將會離開無綫又話《果欄中的江湖大嫂》係告別之作，其實轉投嘅手工藝創作公司，係曾志偉、王祖藍名下，實情又係邵氏子公司，今年初產子後不足一年，香香又復出接拍新劇無綫《 BB大晒》 。

陳瀅

10年做model出道，雖然係模特兒公司旗下藝人，不過14年開始已經被無綫器重劇接劇，仲個個角色都有份量。18年開始陳瀅終於同前模特兒公司講bye bye，正式成為邵氏 兄弟旗下藝人。

黃宗澤

98年出道被無綫一手一腳湊大成為當家小生，黃宗澤17年加盟邵氏兄弟，重心主要放在北上發展，不過亦有主演多套邵氏網劇，包括三套 《飛虎》 系列。