請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

Tiger@MIRROR自嘲下弦 「今日嚟尋求工作機會」獲網民花姐大讚

Tiger@MIRROR出席鮮浪潮頒獎禮時以「MIRROR下弦」介紹自己。

「第十六屆鮮浪潮國際短片節—閉幕暨頒獎禮」前日(6月25日)舉行,出席嘉賓有杜琪峯、MakerVille行政總裁魯庭暉、MIRROR成員Tiger(邱傲然)等。Tiger頒獎前先致辭,直言以「我係MIRROR下弦嘅Tiger」介紹自己,提及下弦幕前工作比較少,希望可以「尋求工作機會」和期望大家看到他們的演出「再決定我哋得唔得」。致辭短片昨晚開始在網上流傳,花姐在IG story轉載並畀like,不少網民亦在討論區大讚,指他「有氣質又幽默」、「淡定得體」。

Tiger笑言希望可以「尋求工作機會」。

Tiger上台頒發「最佳攝影」獎項前先致辭,他說道︰「大家好!近排都好多人搵MIRROR拍戲,梗係好啦!但佢哋搵MIRROR,好多時都係搵姜濤、Edan、搵阿Lo(Anson Lo)、搵阿Jer、搵AK,雖然有搵Lokman,但大多數搵拍戲嗰啲都係搵上弦嘅人。咩係上弦呢?其實MIRROR十二個人,多啲人識嗰六個就叫上弦,無咩人識嘅就係下弦,所以佢哋好少可搵下弦嗰啲人拍戲,例如Tiger、Alton、Frankie嗰啲。有見及此,所以我今日嚟係尋求工作機會!大家好,我係MIRROR下弦嘅Tiger!」。

Tiger頒發「最佳攝影」獎項。

Tiger向在場人士解釋何謂「下弦」:「點解會有下弦呢?可能佢哋覺得呢班人唔得,冇作品點會得,冇作品即係冇人睇,冇人睇即係冇人氣,冇人氣即係冇人知,ok!咁我就諗,冇作品俾你睇,即係冇睇到,咁你又點解知我哋唔得呢?」Tiger引述身邊同齡約23歲的朋友作例子,指有老闆質疑對方的能力,Tiger說︰「點解唔得呢?到底係唔得定未得呢?我都唔知,就惟有盡力試下囉!」

杜琪峯在會上率先發言。

直言平時sell唔講嘢的Tiger,指收到邀請很驚訝:「收到(邀請)呢個消息係好驚訝,我喎,講嘢喎!For大家info,我係sell唔講嘢!但係機會來到就盡力試,因為入行呢幾年學到一樣很緊要的事,就係冇機會就努力啲,有機會就盡力啲,既然今日有機會,我就盡力啲,嚟緊ViuTV有套劇叫《死角》,就係講拳擊運動,裡面有個男仔長頭髮,嗰個就我嚟,我相信大家會睇到嘅。聽講係10月播……相信大家會睇到我,咁睇完之後再決定到底我哋得唔得都唔遲,多謝大家。」

MakerVille行政總裁魯庭暉亦是嘉賓之一。

有出席當日活動的網民出帖文指,Tiger的講稿是他兩日前自己寫,有讓魯生過目。該網民大讚他講話時「淡定得體,很smart」。花姐昨晚亦有轉發Tiger致辭的短片並給予3個姆指大讚。

有出席當日活動的網民指,Tiger的講稿是他兩日前自己寫。
花姐轉發Tiger致辭的短片並給予3個姆指大讚。