前無綫娛樂台主播林子博去年經歷喪妻之痛,肩負起母職的他雖然心痛不已,但今年8月就表示希望可以實踐亡妻董燕君的遺願,好好照顧一對仔女,更舉家移民英國曼城。林子博到埗兩個多月,不忘開設YouTube頻道拍片同大家分享搵屋、為仔女搵學校及自己搵工作的點滴,上個月他就透露自己已經離開酒店,搬入一間樓高兩層的新屋,仲話原打算在曼城郊區定居,但為了幫仔女報讀學校而無奈搬出市區。去到昨日他就呻自己用大約1萬2千港元租下的單位竟然勁多甩漏,更表示「明明新樓,但用料咁差!」
林子博透露單位有齊傢俬電器,仲有車位,當初覺得帶住行李及電腦入住就可以,非常划算,但住落就發現單位有很多甩漏,而且設計欠缺人性化,如浴室的牆壁沒有防霉、洗手盤的冷熱水分開兩個水龍頭,不能使用暖水、浴室大門鎖一拔即鬆、露台的地磚又有鬆脫問題等。林子博指業主於今年年中收樓,呻過單位平但用料差,希望發展商盡快幫手執漏。
此外,林子博又指搬到市區後食物選擇比較多,交通更方便:「之前住喺郊區,去市區非繁忙時間要50分鐘,繁忙時間就個幾鐘,而家揸車出入,十幾分鐘已經到我想去嘅地方。」透露囡囡現時返學不用穿著校服,但囡囡就因為當地校服好靚而好恨著校服,而且開始習慣校園生活識到新朋友。