阿根廷喺世界盃封王，由小組賽同決賽之間嘅戰術變化，絕對值得探討。教練團對四個閘位球員應用得宜，使球隊能夠喺4-3-3、4-4-2、3-5-2等幾套唔同嘅陣式不斷變陣之下，登上世界冠軍嘅高峰，
先數數阿根廷嘅左右閘，風格偏進攻嘅有阿古拿（Marcos Acuña）、摩連拿（Nahuel Molina），而防守力強啲嘅就有達利亞費高（Nicolás Tagliaficos）、蒙迪爾（Gonzalo Montiel）。
喺史卡朗尼執教前期，曾經有段時間好鐘意用當時被視為熱刺後防新星嘅科夫（Juan Foyth），中堅右閘都打得，令球隊喺三、四後防嘅陣式中間有好大嘅靈活性，同時解放左閘壓上嘅進攻能力。但隨著摩連拿、蒙迪爾嘅進步，科夫慢慢失去主力位置， 今屆世界盃就算有隨隊，都只有上陣5分鐘。而列辛度馬天尼斯今屆冇正選踢，主要以左中堅嘅身份，作為球隊喺三、四後衛陣式之間做變動嘅棋子，所以呢篇文不予置評。
當中，摩連拿係五個閘位之中上陣時間最多嘅一位，佢同長駐中場右側嘅迪保羅都有插上進攻的能力，令美斯可以放多啲時間喺中路，唔需要成日去到佢都踢得嘅右翼位拉邊。
小組賽最後一場對波蘭，摩連拿更多時間後收三中堅，空出右路比迪馬利工中單帶突破。而八強戰突然用三中堅，比阿古拿、摩連拿打左右翼衛，主因係荷蘭主打三中堅陣式，史卡朗尼用鏡像陣式對抗，同時阿根廷又有迪馬利亞肌肉不適，所以直接變陣成3-5-2。
不過，撇除摩連拿對荷蘭嗰球入波，摩連拿+阿古拿這對偏攻的組合都唔算特別出色。特別係阿古拿，呢位西維爾左翼衛個人能力雖然尚可，但同隊友配合總係差咁啲默契。就算係突然冒起嘅麥亞里士打，佢嘅作用係喺左邊half-space連繫其他隊友，而唔係專門同阿古拿打左路突破。而對波蘭一役，右翼迪馬利亞偶爾喺轉到左路幫忙，把阿古拿迫到左邊Half-space，喺陣地戰中難以發揮。
嚟到決賽，面對法國右路+翼鋒的結構，高安迪嘅單防能力，絕對有能力阿古拿壓下，咁不如比泰利亞費高出場。
結果係，史卡朗尼正選排泰利亞費高，加上中場嘅干擾，真係喺上半場將丹比利完全凍結，迫到法國半場未夠就換走丹比利之餘，仲喺上半場領先2-0。下半場換入阿古拿打左翼轉陣4-4-2，意圖比兩個左閘喺左路建立防守層次，但比法國嘅亂流博到兩個入球追平，差啲嘔返個金盃出嚟。
但結果論，阿根廷教練團喺閘位實力不足嘅情況下，都能夠砌出一隊冠軍出嚟，實在難能可貴。
留言 0