《紮職》系列事隔唔夠一年再有新作，雖然係獨立故事，但依然保留到上集嘅優點同風味。
依家60蚊就可以入場欣賞，抵到爛！
(以下有劇透)
「越受害 越學會自衛 還望一朝可得勢」
電影以三位男主角所參與嘅幫會內鬥做主線，圍繞一個「義」字，為咗兄弟上刀山落油鍋都在所不惜。劇情推進快，無咩枝節，江湖味重又夠緊湊。故事暴力沉重中帶點溫情幽默，結局卻意想不到地悲壯。
動作場面相當出色，因為打爛仔交所以無咩套路，拳拳到肉，刀光劍影，仲帶點血腥殘忍，睇到我勁肉緊，非常精彩。
「仍是有血有淚有借有還朋友嗎 伴我天生天養出走追尋自我吧」
當年《紮職2》搵依三位主角其實幾有驚喜，佢地更加一拍即合，充滿火花，盡顯深厚兄弟情義。角色塑造貼地，明明係古惑仔但又有人性一面。
Bosco喺電影唔駛再做警察，有多啲發揮空間，比電視劇上更吸引；張繼聰就相對冷靜，一直做和事佬角色，仲保留到搞笑本色，緩和電影緊張氣氛；陳家樂由外型到性格都最似大家眼中嘅古惑仔，固執又屢次闖禍，不過兄弟有咩事一定會即刻衝出嚟幫手。角色展現出佢不同面向，但依然型仔。
不過，三位主角今集都唔及新加入嘅兩位大佬搶鏡。鄭浩南一出場已經有王者風範，剛柔並重，打鬥戲更加係霸氣盡露；相反，陶大宇就奸到勁黑人憎，完全係橫行霸道，有風駛盡𢃇，成功演活依個反派角色。
「傷我不要緊 來日換我猶有餘刃 做大事要狠」
不過坦白講，《紮職3》情節上驚喜唔多，都係大概預料到個種套路。加上 Bosco同周勵淇依段關係太點到即止，感覺可有可無，兄妹感情戲亦有點狗血，所以稱唔上係上乘之作，但整體而言仍然係一套不俗嘅社團電影。
「無退路以我有義靠你有情才有戲 亂世下頑強不死」
近年港產江湖片，仲要唔係警黑互鬥嘅真係買少見少。而《紮職》系列取景同對白地道，有濃濃本地特色，其實相當難能可貴，係得香港先拍到依種味道嘅電影。因此，我好希望可以再有下一集，延續依個獨特文化。
▼Follow hkpopculturelover
Instagram: https://www.instagram.com/hkpopculturelover/
留言 0