恒指在期指結算日跌235點至17,002點，雖然低開，但全日高低波幅基本上唔超過80點，成交亦不足900億元。呢種市況，最大問題係買上去完全唔夠動力，再多的炒作概念政策都好，最終都會變成一句「錢從何來」，的確，貧賤夫妻百事哀，無錢做鬼都唔靈，點救市？有錢就唔使思舊債，追返30年前的稅，有錢，就唔洗共同富裕同甘共苦追返已經派出去的花紅。
講到呢度仲未入正題，言歸正傳，恒指跌的其中一個板塊叫本地地產股，市值最大嗰5間地產公司：新地、中海外、恒基、信和以及九龍倉，跌幅介乎1.58%至5.9%，跌得最跨的係業績唔掂的恒隆，超過11%。本地地產股跌的原因有二，一是九龍置業發盈警，指投資物業公允值重估將錄得虧損，中期或有28億元虧損。
相比起九龍置業的盈警，恒隆公佈的業績更加屬於直接吊打，截至6月底止半年股東應佔盈利跌55.7%至10.61億元，當中計及6.74億元的物業淨重估虧損，相應每股盈利為0.23元；基本純利則跌22% 。盈利跌的同時，公司亦減少派息。恒隆業績直接炸散地產股。
炸散地產股原因簡單，當我係2月3月時寫過，話一眾本地地產公司幾乎無一間有就投資物業公允值變化作出入帳，未來入帳的話會好大鑊，有講過，而地產公司的入帳同時會影響到銀行，因為銀行借錢好靠抵押品，而家銀行睇到份業績，正正係話俾自己知，唔可以再扮睇唔到，唔可以話成條街吉舖無人租對估值無影響，唔可以話估值無影響地產商唔使按公允值變化入帳。
如果記得，應該仲記得我搵過全成地產股的PUT輪，比較好少少只得新地4隻PUT 8月底到期仲要行使價58蚊幾。而家由移民由中美矛盾由內地經濟轉差由息率上升引發的經濟壓力正逐步增加，溢外效應會開始令唔同板塊都受影響，最基本係地產公司影響銀行。
過去現在未來我都無用煽動性或誇張失實的語氣去評論香港經濟，每次都係睇到有不尋常的苖頭再警告大家，未來可能要講少啲，我的習慣是未發生提出意見，發生咗發生緊再講，就會變落井下石。總之鳩根興小心時，大家都要小心。
香港人返工，加油。
李鴻彥
https://www.facebook.com/LeeHungYinJoe
註：專欄作家言論不代表本網立場
密切留意BossMind動向！立即CLS
留言 0