同家人失散係好多人心目中嘅憾事，而搵返親人應該係唔少人嘅願望，不過人間有愛，加上社交媒體發達，比以往更易搵到失散親人。
黃心穎家姐黃心美就係好例子喇！佢同表哥失散廿年，最後靠杜汶澤搵返表哥！
黃心美喺facebook po出一篇「尋找表哥的故事」，佢話同表哥失去聯絡廿幾年，今年70幾歲嘅爸爸好想搵返表哥，但自己擁有嘅資料有限，只能用盡力喺自己個人fb page同ig story出個post去尋親。
心美淨係知道表哥讀男拔，訊息少之有少，有朋友就同佢講杜汶澤都係讀男拔﹐心美雖然識杜汶澤但係唔夠膽貿然搵杜汶澤幫手搵表哥。
點知隔咗無耐，阿澤竟然喺fb回覆心美話幫佢問緊，亦都真係問到表哥嘅舊同學，攞到表哥同同學通電郵嘅email address俾心美。
雖然電郵已經唔存在，但阿澤話唔緊要，已經吹行晒雞幫佢搵，最終，真係搵到心美嘅表哥！表哥仲留言俾心美添！
心美喺facebook post度話：「衷心多謝你杜汶澤先生，由尋晚出post到依家唔夠廿四個鐘幫咗我一個我無以回報嘅大忙。亦衷心感激每一位同我素未謀面仍然願意喺呢件事上幫我一把嘅人。I just can’t thank you enough 我啱啱已經同表哥交換咗電話，我保證以後唔會再同佢失去聯絡。」
而阿澤都喺facebook度表示：「幫到你，其實我自己都開心咗好耐㗎！」仲話想特別想鳴謝返拔萃男書院1989年畢業同學齊心合力。
相信心美爸爸一定會好開心㗎啫！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0