MIRROR ERROR終於現身！Anson Lo心情靚爆

人氣男團MIRROR及ERROR 16子今日（23日）出席屯門市中心活動，到接近中午時分，現場Fans急升，目測超過5,000，成員粉絲人數不相伯仲，當中以Anson Lo、Edan「大叔CP」粉絲霸到舞台左右較有利位置睇偶像，而3樓兩邊都係餐廳可以俯瞰舞台，「鏡粉」冇錯過機會霸盡靚位！

於中午12時06分左右，全場粉絲不停大叫偶像名，相隔1分鐘，兩隊成員於3樓乘搭扶手電梯現身，向大家不停揮手，非常親切！16人以工裝Dress Code到場，MIRROR行黑白風，而ERROR就行卡其Tone，到16子終於齊集台上後，粉絲尖叫吶喊，全場進入瘋狂狀態，而獲「神徒」力撐勇敢出櫃嘅Anson Lo，心情大好！

3千人倒數見MIRROR ERROR！粉絲企櫈試位大合唱

東京奧運今日（23日）開幕，ViuTV出動「台柱」超人氣男團MIRROR及ERROR下午到屯門市中心出席活動，商場有其中一區開放24小時，所以有唔少粉絲為近距離見偶像通宵達旦守候，非常誇張！到今日一早，現場人數愈嚟愈多，3層滿布「鏡粉」及「404」（ERROR粉絲名），合共最少超過3千人，眼見有不少姜濤應援手牌，有粉絲趁有時間食早餐醫肚，又不時出動「大炮」、電話、櫈仔試位影相，雖然人多非常擠逼，又有啲焗促，但粉絲都相當有秩序，，有保安駐守，但有劃分區域被推跌，有支持者就呼籲大家「企疏啲」互相遞就，現場亦有通道留予其他人士行走，橫跨3層嘅扶手電梯就已停用！

雖然人未到，但商場就不斷播放各個成員嘅MV及歌曲，當播到《大叔的愛》主題曲《突如其來的心跳感覺》時，全場粉絲一齊大合唱，見到Anson Lo MV時又尖叫，情緒高漲！

而其中有兩位「姜糖」於今朝6、7點到場，成功霸到有利位置追星，而「上班族」Fiona特登請假嚟捧場，佢更自爆係「我老婆嫁左比Mirror導致婚姻破裂關注組」當中用上姜濤照片做牆紙嘅主人翁，佢透露張「牆紙」係巴士燈箱Banner，5米x2米，係喺一個聖誕Party上一位粉絲抽中，但屋企空間有限而轉讓畀佢，而喺新年時老公想除低，但被佢拒絕，不過佢話老公冇介意仲係「姜糖」添，今日仲車佢到場呀！

另外，早前7月7日生日嘅Anson Lo，獲「神徒」喺各處賣廣告祝福，而今日就有架印有Anson Lo照片嘅巴士停泊喺屯門市中心巴士站，不少途人駐足拍照！

東網網站 : https://on.cc/東網Facebook專頁 : https://www.facebook.com/onccnews/