「軒公」張敬軒原本去年年尾舉行的《張敬軒THE NEXT 20 演唱會》，受政府收緊防疫措施影響而被迫將最後8場演唱會延期，最近隨住措施放寬終於可以將剩下的場次重開，軒公更幾乎晚晚唱到超時，又邀請不同歌手上台做嘉賓，令粉絲睇到唔願走。
昨晚軒公就邀請岑寧兒及藍奕邦上台，當他介紹藍奕邦出場時，更透露自己已經有超過十年冇同對方同台，又話早年自己在香港朋友不多，會約埋圈內創作人上屋企聊天、夾歌的其中一人正正是藍奕邦：「今次演唱會，我打過畀佢，我話喺我20周年，好想你嚟見證，冇幾多個廿年，人生亦都冇幾多個20年嘅老朋友，所以今晚我好開心，呢個老朋友可以嚟我演唱會表演。」二人唱完《我倫敦你紐約》後相擁，畫面溫馨。
藍奕邦亦突然超感性在台上表示：「我都好感激你一樣嘢，除咗你叫我嚟做嘉賓之外，我代表所有觀眾多謝你，因為你冇忘本。你冇忘本嘅意思就係，識你咁耐，同埋近年對話當中，我知道你好清楚，你得到嘅所有成就係咩人、邊度嘅人同埋邊一個地方嘅人，所以我先做呢次演唱會嘉賓，因為冇乜邊幾個其實。」全場粉絲聽完即時歡呼，而張敬軒亦合鞠躬多謝對方，亦回應：「我喺呢個城市，灌注咗我20年嘅青春，同埋我嘅好多好多生活喺呢度，而呢次演唱會亦都好多謝我嘅觀眾同歌迷話畀我聽，大家冇忘記我，所以好開心，好開心好開心，可以同Pong Pong share呢一個舞台。」藍奕邦完騷後在社交平台搞笑表示：「唔記得台上送我份禮物俾你。」笑言自己要去飲番杯冷靜下先。
