曾參加《全民造星V》的KC（黃家灝）x Tsoul（田曜誠）一直夢想成為跳舞明星，將跳舞文代在香港推廣普及。二人繼出道記者會第一次合作公開跳《GET SILLY》，最新MV亦已經上架。片尾慢鏡逐一出每位dancers名介紹，KC同Tsoul終於感覺真實，說：「香港dancers好多時被忽略，而我哋想做跳舞明星，唔係想話要做到似邊個？或者要搵到幾多錢！我哋只係想透過今次機會，做到自己鍾意嘅嘢、又可以推動到香港跳舞文化。所以當見到公司俾我哋MV逐一出dancers名、仲有好大隻字，配埋慢鏡俾佢哋，同一般出dancers名好唔同時，真係好開心，感覺做到想做嘅事，今日做到一小步，明日至有機會有一大步。」
今次當中KC找來WinWin排舞、並與四位dancers Kahay、Jasper、Athena及Siu Yee Yau 先後在花園街、汀九等街頭跳舞；Tsoul則由KaKa排舞，並與另外三位dancers兼教他跳popping的老師 Louis、Lyle、Bobby在銅鑼灣鬧市、灣仔海旁等跳舞。
Tsoul說：「《GET SILLY》算係一大突破，跳自己嘅歌，有跳舞MV、仲有兩種唔同舞種融合，證明香港係可以唔同舞種一齊跳，然後have fun同get silly。」KC補充：「過去拍跳舞片，大家係跳舞圈內嘅人留意，無諗過宜家做嘅嘢可以俾更多人睇，呢個係我哋想做嘅目的，更希望跳舞片同時可以令唔喜歡跳舞嘅人喜歡跳舞，感受到我哋喜歡跳舞原因。」
《GET SILLY》雖然是跳舞MV，但歌曲班底一樣強勁，由JNY監製、Rouno、SQVARE及AVENUE 52作曲、T-Rexx填詞。KC同Tsoul希望透過《GET SILLY》，鼓勵大家不但是舞者，其他人都要像二人一樣要勇於為夢想踏前，因為去年就因一下衝動踏出參加《造星》，今日至有機會做自己想做的事。
至於在出道記者會上 KC同Tsoul沒有唱只是跳，是因為二人演出都會專注在跳舞為主，就好像出道記者會上，二人的演出是最炸台，比拍MV及排練時更好。Tsoul說：「嗰刻完全感覺到與KC相連，大家愈跳愈有，好爽。跳完第一時間大家攬咗一下，而識唱一齊跳係我哋嘅口號，因為現階段表演會以跳舞和編舞為先，好像外國好多跳舞明星一樣，跳自己歌時都不一定唱，希望這種文化亦可以慢慢令大家認識。」現時《GET SILLY》正進行dance challenge，KC與Tsoul歡迎大家跟住跳,，甚至是free style，再上載分享。
