是非不斷的謝安琪，17年大鑼大鼓宣布加盟麥浚龍的「幻國文化」旗下，當時已有指她為怕公司分散資源，極力反對Juno（麥浚龍）再簽薛凱琪，一姐地位意氣風發，在Juno力谷下事業成功再上；不過轉眼三年合約快將屆滿，近日傳出Kay計劃另起爐灶，與Juno經常意見分歧，獨斷獨行未經公司同意下上周耀輝Live節目唱從未發布過的新歌，又一度取消關注Juno惹來種種猜測，近日再爆出她未有履行合約精神，瘦身不成令纖體廣告合約泡湯，「幻國文化」因而損失七位數收入，連累公司為她執手尾。
撰文、圖片：東方新地
謝安琪傳與Juno擘面兼激怒廣告商
不管是唱片公司定經理人，「合久必分」似乎每次都應驗於謝安琪與她的合作夥伴，先後與環球唱片、經理人夏森美、周博賢不歡而散，18年加盟Juno的「幻國文化」旗下，二人關係密切經常孖住上台合唱，在Juno力谷下，近兩年阿Kay更橫掃叱咤頒獎禮盡擸大獎，不過，隨著Kay的合約快將屆滿，二人的蜜月期亦一去不返，早前Kay被發現突然取消關注Juno的IG，令二人不和傳聞不脛而走，近日再爆出「幻國文化」年初為Kay接下一個纖體廣告，但Kay身形一直不達標令廣告拍攝期一拖再拖，更有指她棄用廣告商提供的纖體用品，又不理指示自行跟教練操肌，激怒廣告商最終令合約終止。
Juno以千萬簽謝安琪 3年後老闆都無面俾
據知情者透露：「六年前Kay同Juno首次合唱，Juno有財力，嗰時Kay好識做，成日黐住Juno又大讚對方有頭腦，兩個好快已經成為密友，到Kay停工生完女， Juno仲以千萬簽Kay加盟公司旗下，因為要收復失地，Kay入公司初期，真係好聽話，乜都會依Juno意思去做，不過時間耐咗，Kay已經好有自己意見，公司職員幫佢接工作，唔滿意就唔做，搞到班員工無所適從，近期佢連Juno都唔畀面！兩個開會經常各執一詞，依家兩個見面都面左左！」
薛凱琪拒被Kay騎住簽Juno撻Q
家底厚的麥浚龍Juno當年投資成立「幻覺文化娛樂」拓大個人娛樂版圖，鎖定簽起雙「琪」謝安琪薛凱琪發圍，講足大半年，近來產女抖足年幾的謝安琪，終於復工坐正成為公司一姐，Juno更落足本幫Kay大堆頭製作新歌。見Kay頭威頭勢先聲奪人，難免令薛凱琪眼紅，同Juno傾足大半年約仍未成事，全因唔甘心過檔畀Kay騎住只做阿二，決定反口縮沙，最終無緣合作！
薛凱琪 Juno 傾足大半年
12年離開效力十年、一手捧紅自己嘅華納唱片，薛凱琪就係貪可以喺太陽娛樂坐正一姐之位，兼且旨意Paco出力打入內地電影市場。六年來雖然靠太陽娛樂同Paco成功北闖佔一席位，不過又係簽完約即遇上鄧麗欣回流，表面一姐實情身份地位都遠遠不如Paco多年愛將，自然耿耿於懷。當年36歲未有拖拍唯一寄託就係事業同買磚頭，Fiona兩年前與Juno合作歌曲〈結〉時已經密密斟商量合約事宜，直到17年底落實細節，一心諗住滿約就有得過檔，一圓一姐夢。
一山不能藏二琪
據知情人士透露，Fiona的如意算盤全部因為生完女自由身隨時可以簽約開工的謝安琪打亂：「Juno間幻國娛樂同電影公司一定會愈做愈大，第一步就係簽晒『雙琪』返嚟。其實Juno冇諗過邊個先係一姐，反而Kay好大方，佢好有音樂理想，一早話過新公司簽多啲人百花齊放仲多元化，係Fiona一直以為一姐過檔件事可以好隆重，點知佢舊約未完、嗰頭Kay已經簽咗約仲開緊工，第一首主打歌就係Juno監工導演動員全公司拍MV。見到Kay係威係勢，Fiona唔想過檔被人騎住。」
留言 0