2019年剛剛開始兩個月,TVB接連有兩位藝員,蓋世寶同李天翔心淡決定離巢!日前,甘草演員劉桂芳更喺個人社交網留言,大爆自己被減薪,同時亦爆出TVB「老人約」一事,紛紛惹嚟網民關注!
撰文:東方新地|圖片:劉桂芳Facebook、蘇恩磁微博
劉桂芳爆委屈減薪95%
日前,蓋世寶因被TVB要求減人工而成離巢最大主因,而甘草演員劉桂芳得悉相關新聞後於facebook留言:「我減了百之之95%人工,好多人係咁,大概這是公司的計劃。」,留言一出隨即惹嚟唔少網民熱烈討論!
88年簽約加入TVB、現時61歲嘅劉桂芳雖然主要係做跑龍套角色,但仍然為TVB效力長達31年,皆因佢認為一套戲唔可以只有主角,即使係配角,甚至二打六都係有各自嘅重要性,所以至今先會仍堅持演出。
對於被轉約,唔少網民都為TVB藝員感到不值之餘,同時亦表示TVB做法卑劣!劉桂芳事後亦表示自己嘅合約被改為兼職,但因改約嘅事屬自願性,所以只要想有得留低就冇得唔被減人工!
為TVB效力31年嘅劉桂芳被傳媒問到面對被逼減薪係咪等於變相被逼主動辭職,佢就指「冇嘢㗎啦」。追問期間,劉桂芳就以「俾公司鬧緊」為由唔願意再講落去,睇嚟真係有難言之隱!
被下令封口嘅劉桂芳原來農曆新年後曾於Facebook留言,大吐苦水,指:「整個新年都是憤怒心痛與悲哀的!希望永遠不會再有。」,字裡行間都感受到佢有幾傷心失望,未知係咪同轉約減薪一事有關!
藝員恐慌
至於另一位同為綠葉嘅蘇恩磁亦於TVB工作即將第30個年頭,對於劉桂芳被減薪,蘇恩磁亦唔排除會「他朝君體也相同」外,更坦言預咗會發生。
據了解,TVB藝員其實多年嚟一直都流傳一份「老人約」,合約內容係將長約藝人轉為自由身,眾所周知咁做除咗令員工冇醫療福利外,同時亦係公司為節省支出嘅做法,簡單嚟講就係縮數!
而效力時間較長嘅蓋世寶及劉桂芳都先後接到「老人約」,陸續應該會有更多TVB藝員會收到,相信作為員工都應該考慮一下自己嘅去向之外,仲要諗諗值唔值得留喺TVB。
蓋世寶決心離巢TVB
現時39歲嘅蓋世寶自1996年加入無綫電視後,一直擔任兒童節目主持多年,由《閃電傳真機》、《至Net小人類》到《放學ICU》,足足18年都有佢嘅身影,更因而被譽為譚玉瑛接班人!
發展大不同
可惜,正當大家都以為Lulu會繼續效力兒童節目之時,無綫卻於2015年時對兒童節目進行大洗禮,將所有當時嘅舊有主持一一調走,就連元老級人馬譚玉瑛都要out走調到《東張西望》,而Lulu則被調至戲劇組。
然而,雖同為被調走嘅人,但譚玉瑛之後嘅發展明顯比Lulu好得多,皆因譚玉瑛其後與李家鼎主持《阿爺廚房》,除咗因二人新鮮嘅組合主持節目而成為大家話題外,同時有廚藝了得嘅鼎爺座陣亦令節目非常成功,幾乎每年添食之餘,譚玉瑛同樣成功轉型!
被調入戲劇組
至於Lulu,雖然調入戲劇組,但一直做閒角,事業上未見起色。同時,Lulu當時亦擔心自己多年嚟深入民心嘅兒童主持形象太入屋而搣唔甩觀眾對佢嘅印象,加上因演員收入係按演出量計算,故亦擔心收入唔穩定嘅問題。
2017年Lulu喺TVBI擔任新節目《一周八爪娛》主持,但上年開廠到化妝間時至知曉節目已被取消,部門突然解散,更曾連續9個月沒工開!而今年Lulu同公司傾續約事宜更提出減人工條件,故令Lulu更對娘家心灰意冷,決心離開!
據了解,雙方傾約期間,無綫以Lulu演出量不足及個人成績表唔好為由,要求Lulu減人工,而Lulu亦指已睇唔到自己喺無綫嘅前景而決心離巢!
退出娛樂圈?
回顧多年嚟將最青春的時間貢獻俾無綫,Lulu坦言自己冇後悔,同時亦指未有退出娛樂圈嘅念頭,縱使將於今年踏入女人40嘅年頭,但亦未感徬徨,會積極面對嚟緊嘅新挑戰!
精選9位80、90後兒童節目主持
|蓋世寶
最近蓋世寶可謂是最hit的人物,多個熱門網站和論壇討論區都有她的蹤影。除了有人用網名「蓋世寶X老母」令她爆紅外,兒童節目算是她演藝人生中最成功的節目。Lulu姐姐和譚玉瑛姐姐一樣,見到她們就已經等於兒時的回憶!
|譚玉瑛
譚玉瑛姐姐的名字相信無人不曉,在1982年起的「430穿梭機」到2千年的「放學ICU」,她是唯一當過所有這些兒童節目的主持人,在2014年離開兒童節目時段,總計長達32年在當中渡過,所以無論幾歲到40幾歲的香港人都由她陪伴下成長。
|張美妮
張美妮與蓋世寶一同做主持人的時候,猶如孖公仔一樣出雙入對。但比起蓋世寶的悲慘的經歷,張美妮幸運得多。她自《至Net小人類》停播之後,就開始在戲劇和綜藝方面發展,而且都有不錯的成績。
|李天翔
「認字特警」李天翔是不少小朋友心中的童年偶像:「我係認字唔認人嘅認字特警」,做得「認字特警」就當然是專捉小朋友錯字,教寫正字的人。雖然「認字特警」也曾有其他人扮演過,但若提起「認字特警」,第一個還是會想起他。
|伍文生
伍文生最令人印象深刻的,一定是在《閃電傳真機》所飾演的「吱吱鼠」,因在每句說話後面都加上「吱吱」兩聲,諧趣形象令他成為小朋友喜愛主持之一,可是他已退出娛樂圈,現時已是一間食店的老闆。
|羅貫峰
羅貫峰與日本男星生田斗有幾分相似的,所以向來都是網民們的熱議對象,若於搜索引擎中都會顯示二人同時出現。除了《大冬瓜》、《十兄弟》和生田斗真令人最有所象,其實他在兒童節目中也經常擔任主持!
|唐韋琪
唐韋琪一定是兒歌歌手最出名的歌手,和Purple姐姐(李紫昕)都是專業的兒歌唱作歌手,她唱作的歌,如長腿叔叔、小司機Noddy等,首首都是耳熟能詳,說是8、90後的童年回憶絕不誇張。
|孔褀
TVB的兒童節目主持當中也有不少年紀輕輕的小主持們,其中最有名氣的一定是孔褀,皆因小時候在兒童節目中都一定會看到她的面孔。不過相比起兒童節目,「孔祺初試性感」的相片還是最人熟悉,不時都被網民重提討論!
|吳綺珊
而後期才加入的節目主持吳綺珊,她最有名的就是唱膠歌,就好像這首《麵麵麵》一樣,洗腦程度非常高,麵麵麵麵麵麵…聽到小編都飽晒…
留言 3
chuan
大台 點解咁小氣呀 沒點人情味 越來越衰!
2019年02月19日08:24
edward
知道D甘草演員冇得起飛腳就由僱員變自由身,强積金都慳埋,D哥仔姐仔趁有市場唔走就儍
2019年02月19日11:58
香港打工仔邊有前途, 儲夠錢有得走好走
2019年02月19日07:54
顯示全部