交換禮物係中獎定中伏
講起聖誕節，大家都會諗起同一班朋友、屋企人開party，交換禮物當然就係必備環節。收禮物最怕收到D唔啱用又佔空間嘅禮物，如果係抽獎禮物，大家事前都唔知道禮物會俾邊個，呢個時候就更加難決定送乜嘢。今日就係睇吓呢十大最常見嘅禮物，到底係咪大部分人都啱用，收到呢D禮物係中伏定係好彩呢？
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 頸巾（191筆）
以前中學嗰個年代成日都會見到D女仔偷偷地係枱底織頸巾，雖然話出面周街都買到好多靚款，不過一針一線出嚟呢份心意，就幾多錢都買唔到！人大咗，可能更加無時間，如果願意花呢個心機慢慢織一條頸巾，無論送俾閨蜜定係心上人，收到都一定覺得開心，冬天再凍多幾度都唔怕，一樣都夠曬warm～
網友話：
「咁多巴打想要頸巾 唔驚織得樣衰但被迫要帶咩？」
「聽講織頸巾係分手魔咒嚟……」
image source:Facebook/織嘢 JickYeah
9 Handcream（212筆）
每逢聖誕節，好多品牌都有特別推出聖誕禮盒套裝，當中價格最平易近人嘅就大多數都會係handcream套裝，大家咁多年來收收埋埋應該都唔少～相信都試過多到用唔完，又轉送俾第二個。Handcream同搽上面嘅產品比起上嚟無咁揀人用，成分一般都係大家都啱用，見到係大牌子嘅包裝，份禮物望落都比較得體。
網友話：
「Hand cream 同保溫杯，真係見到都驚。」
「未見過有人收到Handcream會開心……」
image source:Facebook/The Body Shop
8 銀包（258筆）
銀包呢D每日都一定帶要出街嘅物品，當然都係禮物嘅選項之一。就咁諗就覺得夠晒實用，不過每一個人鍾意嘅款同埋需求都唔同，收到唔啱用其實都係浪費。加上好多人嘅銀包一用就用幾年，如果吓吓都收到個新銀包做禮物，真係用都用唔切。不夠如果係近年流行自製皮革銀包，我諗收到嘅人一定會覺得好窩心。
網友話：
「前女朋友送嗰個已經用咗十年，希望今年有新銀包用。」
「錢就得咁多，銀包就好幾個。」
image source:Facebook/agnès b.
7 香水（309筆）
以前大家刻板印象都覺得女仔先會特別注意自己嘅形象，不過近年其實好多男仔都一樣好講究㗎。無論男女，如果行過就散發住一陣香味，第一印象應該都會加唔少分。如果選擇香水嚟做禮物就要小心啦，始終香味呢家嘢好睇個人，但係假如係送一D特別造型嘅小香水，就算只係作收藏用，香水控收到都一定會好鍾意。
網友話：
「造型靚嘅話，唔聞得都睇得」
「之前收到隻味麻麻嘅，直接放係廁所當除臭噴。」
image source:Facebook/ Armani Beauty
6 香氛（417筆）
對講究生活質素嘅人嚟講，出街要噴香水，喺屋企更加要營造一個自己最舒服嘅環境，呢個時候香薰就係好緊要嘅一個重點。而家嘅居家香薰有好多唔同選擇例如香薰噴霧、香薰蠟燭，香薰座等等，放工返到屋企咁攰，點返個香薰舒緩下，諗起都覺得chill～每日聞着仲會記住係邊個有taste嘅朋友送俾自己添！
網友話：
「迷你香薰套裝有齊diffuser、蠟燭和香氣噴霧，最啱送禮物。」
「之前送咗個同個friend嘅偶像同款蠟燭俾佢，放咗兩年佢都唔捨得用。」
image source:Facebook/ Yankee Candle
5 年曆、行事曆、月曆（500筆）
話就話而家大部份人記schedule、睇月曆都靠一部電話做晒，不過我諗大家屋企或者公司都仍然會擺番個月曆先會安心。細個學校抽獎環節一定曾經有人抽中月曆，即使宜家大部份人已經習慣用手機記事，月曆擺出嚟可能只係一個習慣，所以大家都冇乜特別要求，收到亦都唔會特別嫌棄。不過聽聞唔少網友都話試過抽獎中伏收到過咗好幾年嘅月曆，真係唔知好嬲定好笑。
網友話：
「講起我收過最伏既禮物 一定都係過期月曆」
「最伏係收過2013年月曆……」
image source:Facebook/WHOSMiNG
4 臉部護膚品（621筆）
除非你好了解收禮物呢個人，如果係好閨蜜或者都可以考慮吓，送護膚品做禮物，臉部護膚品呢D比較個人嘅物品，如果唔係好熟嘅朋友，其實係一個都幾大風險，分分鐘唔啱用，用完敏感就尷尬啦。建議大家如果真係想送護膚品，都可以選擇比較大路，成份比較溫和嘅面膜，咁就適合更多人用，但當然最好都係你對收禮物嘅人有一定程度嘅了解先好選擇先好揀送護膚品啦！
網友話：
「送唔啱好尷尬，用又唔係，唔用又唔係」
「同意送保濕mask，不過唔好買韓牌因為好易敏感。」
image source:Facebook/ Innisfree HongKong
3 文具（632筆）
以前小學聖誕聯歡會，一定見過有人買文具套裝做抽獎禮物。大個之後公司一般都會有文具提供，自己買文具好多時都係為咗鍾意嘅卡通人物，或者有特別需要，例如本身鍾意寫手帳，就會特登買靚筆寫。嚴格嚟講文具都算係實用嘅禮物，例如如果你知收禮物個嗰人鍾意咩公仔，特別去買日本版嘅文具送俾佢收藏，佢一定都會好好珍惜，同覺得你有記住佢嘅喜好。
網友話：
「有次收到無針釘書機，好好玩又環保」
「有無人明白收到成套筆嘅滿足感」
image source:Facebook/ MUJI Hong Kong
2 化妝品（786筆）
化妝品相信係好多女仔平時自己都會投資好多嘅一個範疇，無論聖誕節、情人節，又或者拍拖紀念日都好，大部份女仔收到一支靚嘅唇膏都會由心笑出嚟，而且唇膏、眼影呢啲用得又可以收藏嘅嘢，通常都唔會有人嫌太多。而家好多品牌會出合作聯名限量版，如果你留意到，又成功搶購送俾好朋友或者女朋友，一定會氹得佢好開心～
網友話：
「我成日抽到女人野，唇膏眼影都收過，有女嘅時候直接送比女朋友。」
「係咪我色盲 點解覺得女朋友支支唇膏都一樣色？」
image source:Facebook/ Dior
1 零食（1002筆）
聖誕節開返個party就一定係基本嘢啦，除咗食大餐、玩遊戲，準備一大堆零食食唔停都係必備嘅。有唔少網友都話，其實寧願禮物收到堆零食，大家即場開心share食曬佢，都好過收到一D唔實用嘅禮物，唔知攞嚟做乜，掉又唔係，留又唔係。零食呢D嘢大家食完就冇，起碼唔使拎D無謂嘢返屋企擺～
網友話：
「食物食完就會消失，唔食都可以送比中意食果樣野既人食」
「眼不見為淨，寧願要食物消耗咗，可以無眼屎乾淨盲。」
image source:Facebook/ 香港零食大王
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2018年12月14日至2019年12月13日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『聖誕禮物』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
留言 0