荃灣街市豬肉檔「肉類分割員」威威（劉宋威）因為戴咗口罩好靚仔而爆紅， 日日成堆女人圍住檔口求合照，更有Fans開Page 「荃灣鮮肉威威應援團」支持，仲搞粉絲見面會同佢過生日，不知幾威水。
不過，今年35歲的威威以前應該得罪唔少人，「有心人」開設「除罩威威留餸區」專頁狂揭佢黑歷史，近18000成員日日等睇威威陳年爆笑肉照上架，晚晚不知幾熱鬧。雖然負面嘢纏身，但好一個威威，你有你爆，佢有佢繼續做運動發放超強正能量，仲有廣告拍添。
日前，威威專頁出Po表示好緊張：「人生第一個電視廣告今晚首播，希望大家支持！」廣告將於今晚8點半喺TVB及7點42分喺ViuTV播出，但下午已有30秒預告曝光，背景係威威個豬肉檔，有班女人拎住電話狂影威威，班囡囡有對白㗎：「威威對眼好Charm呀。」、「威威手臂好大隻呀。」配合畫面當然見到威威冧死女嘅雙眼，同一對久經訓練嘅壯臂。
然後威威除罩真身終於曝光，佢示範食健康產品，再叉腰顯示自己身體有幾強壯，不過留意返，預告個YouTube唔知點解關咗留言功能，唔知係咪怕負評太多呢?
預告一出網上即瘋傳，但笑佢嘅佔大多數，留言相當抵死又爆笑：「個樣睇落成個4、50歲嘅阿叔咁」、「死都唔開口」、「閉氣閉到窒息喇」、「眼耳口鼻全部都硬過佢把豬肉刀」、「賣廣告賣到殺父仇人咁，個客都幾忍得佢」等，實在太多不能盡錄，希望威威見到唔好唔開心啦。
再睇返「荃灣鮮肉威威應援團」，唔知Fans係咪嚇親，有「威威豬」PO咗威威真身出嚟，上載兩個鐘都係得200個Like，仲要留笑笑嘅佔大多數，留言得42個，同以往爭好遠。
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
