鮮娛糧｜昆凌罕晒2歲細女相　證周杰倫基因勁

台灣天王周杰倫（周董）同太太昆凌婚後育有大女Hathaway、兒子Romeo及細女Jacinda，雖然夫妻成日分享家庭生活照，但為保護孩子隱私，佢哋一定會會遮住小朋友部分五官，避免真面目曝光，令到外界對小朋友嘅外貌更好奇。近日昆凌就晒出多張細女Jacinda近照，透露阿女開始會做家務，甚至化身「小小主廚」，可愛萌樣Cute爆網友。

雖然眼睛同頭髮都被昆凌用貼圖遮住，但可愛身影仍令許多網友尖叫嗌可愛，昆凌寫道：「妹妹現在有了很多新鮮的探索想法，嘗試做小餅乾、做各種家務，看到她小小的身影，就是我的療癒日常」見Jacinda拎迷你打蛋器同桿麵棍做餅乾，又用小夾子夾餅乾同吐司，一時就戴起手套擦拭洗手台，甚至仲識自己將外套掛返入衣櫃，兩歲人仔都識做好多嘢。

不過網友嘅重點，就擺喺Jacinda個小嘴仔同老竇周杰倫十分相似「這小嘴，爸爸的基因太強大啦」、「好可愛啊，小嘴兒好像杰倫」。更有人搵番周杰倫童年照做對比，驚呼「這不就是周杰倫本倫」。

東網網站 : https://on.cc/東網Facebook專頁 : https://www.facebook.com/onccnews/