馬拉松，香港人跑得多啦，每年都有七萬人玩。海拔5300米的馬拉松，你聽過未? 聖母峰馬拉松，係全世界真．最高的跑步比賽，自2003年首辦，21年來完成到的香港人兩隻手數得晒。
會友李穎旋 (Alice) 及其兒子曾載善 (善仔 Celvin) 係一個特殊家庭，善仔屬輕度智障的自閉人士，曾經入過精神病院；Alice 作為照顧者，亦放過一場長長的病假。但 Alice 從未把善仔視為負擔，而係一位上天派來的天使，陪伴她面對高山環境複雜多變的危險，一齊順利完賽。今次我哋西柚特別訪問佢哋兩位賽事心得，睇下比賽前後有咩奇遇分享。
上天派來的天使，陪伴我做又儍又難忘的事
首先要講，佢哋兩位跑步 CV 厚過電話簿，十年有起有落的運動生涯，有五次3000米以上登山經驗，包括尼泊爾安娜普納基地營 Annapurna Base Camp 徒步行 (簡稱ABC)、台灣白岳、馬來西亞神山、日本富士山，另有二十隻馬拉松，超馬則有蒙古沙漠250K、肯亞草原230K、戈壁100K、騰格里100K，以及不少長途越野賽。
終於到達Everest Base Camp
Everest Base Camp (EBC) 被譽為一生一定要去一次朝聖的健行步道。 到第一高山要有敬畏心，他們累積經驗後，碰巧其拍檔 Edward Chan 亦打算參加，於是成行，踏上再往尼泊爾之旅。
跑，但不止於跑。順帶一提，他們參賽動力不僅為挑戰，另外仲有支線任務：去尼泊爾 DOCS Foundation Nepal 做侍奉，探訪當地孤兒院，兼派禮物，做真正的關愛隊。
旅程始於加德滿都，第一個難關就係飛往下一站盧克拉 Lukla。Lukla 天氣條件蠱惑過蠱惑的鎗，其機場擁有最危險的地勢，升降期不固定，他們飛機航班亦被取消，唯有坐直升機飛過去。
話就話馬拉松，實則係超馬。唔係一到 Lukla 就有得跑，要行走65公里到珠峰大本營 (EBC）。你無睇錯，係65公里，仲長過正賽本身。
旅程最高點：5550米 Kalapatthar
參賽者被分為三組，Alice 與善仔所在的組有十五人，分別來自七個不同國家。去起步點的過程，要徒步行走的，要做高山適應 Acclimatization：在三千米高的南崎巴札 Namche Bazaar 要過一日，到四千米高 的丁伯崎 Dingboche 又一日，爬到行程最高點 5550 米 的卡拉帕塔 Kalapatthar 之後，才下降去5300米高的 EBC ，過兩晚克服高山症和嚴寒。
此比賽的特別之處，是需在昆布冰川 Khumbu Icefall 邊緣露營睡覺，很夢幻。
在5340米高的 Everest Base Camp 野外露營兩晚，畢生難忘。
未到起點之前，他們已經非常疲憊。Alice 臨天光就感到頭漲頭痛，需要大量飲水解決，夜尿導致睡眠質素不佳，以致發過兩次相同惡夢 (內容是 DNF 走佬)；善仔則因自閉症表達能力不佳，更需要 Alice 密切關注其需要: 側睡的話，需靠右瞓，心臟在左，不可壓住。
Life is Water; Water is Life. 高山之上，氣壓稀薄，很乾燥。Alice 指出，黃金進水時間係過夜後的朝早，是最缺水的時候。簡單的記法，到海拔3000米要日進3公升，到4000米或以上要4公升。高山食水不乾淨，很多跑友有輕微腹瀉 (in case you wonder，營地「廁所」只係挖個洞，放個木桶，兩旁置石頭，深蹲解決）
跑馬拉松，儲醣係常識。飲食只有薯仔、豆、飯、意粉。無肉食，而且胃口不可能好，總進食量亦不多，儲醣更是奢望。
起點在著名的昆布冰川旁，清晨六點前氣溫跌至零度。
講咁耐，終於到比賽
Alice 與善仔大清早 0430 起床，到 0600 才在 EBC 昆布冰川邊緣等待起跑 (未跑前已企足一粒鐘，肚痛兼手腳凍到發麻)。
唔好以為咁樣好慘呀。有一個參加者急性肺積水；另一人則在EBC吸氧一晚，仍不行，未起步先放棄，DNS，直升機送院。［註：參加者必須購買個人保險，其中包括緊急撤離計劃 (否則在賽事中緊急使用直升機離開，從EBC搭機需付5000美元）］
起錨了。 起點高五千多米，之後幾乎無冰，但路況複雜；有樓梯，但係由圓石組成，凹凸不平，巨石、澗流不缺。
42公里後要落到3000米嘅終點 Namche Bazaar，唔好以為有落無上，全程係反覆上落，途中有三次上大斜坡，需要 Power Walk。
荒山野嶺，補給自備。 賽會在其中一個 Checkpoint 提供朱古力，另一個就有 Energy Bar，好在沿路所有 Checkpoint 都有充足食水供應。
之前的屆數，有香港參賽者迷路，大幅度偏離賽道，把全馬走成超馬。 Alice 一行人指出今次路標清晰，沒有走錯，似乎是安排改善了。
至於普通馬拉松常見的撞牆現象， Alice 與善仔則沒有遇到，可能係落斜不純熟，速度不快。取而代之的是，路上持續肚痛，痛到終點。
三人一條心
聖母峰馬拉松係佢哋經歷過最難嘅馬拉松，甚至認為比號稱全球最難嘅金山嶺長城馬更難。
過江龍難敵地頭蟲，更何況係地頭龍呢? 外國人不可能與尼泊爾本地參加者比較: 賽事關門時限 Cut Off Time 係 16小時，尼泊爾本地人嘅冠軍竟然 SUB 4 就搞掂!
公道起見，主辦單位已把參賽者分成尼泊爾組與非尼泊爾組，非尼泊爾完成者共 127人，Alice 、善仔、Edward 三人無穿無爛10小時21分完賽 (最後的衝線者用時 14 個鐘)，比上不足比下有餘。
終點在3440米高的 Namche Bazzar。此高海拔比賽舉辦由2003年開始，舉辦了21屆，完成此賽事的香港跑友有七人。
完賽後是原本平凡不過的甘甜，沖熱水涼是最感幸福的事 (他們連續四日無洗澡了)， Alice 更加係握住完賽紀念牌睡覺。 之後享受人生最開心嘅慶功宴，與其他參加者、Porters 、Track Guide 一同跳舞唱歌飲酒食飯，出發前的預訂目標亦全告達成。
渡過一生人最開心的慶祝晚宴
Alice組別共有15位來自七個不同國家的跑友，他們對善仔特別友善。
以為咁就完? 完賽後係要徒步翻 Lukla，行足三十多公里先走得。
擔扶和雪巴人 (porters and Sherpas) 是最值得尊重的無名英雄。
按 Alice 所言，聖母峰馬係難度高到可跑一次不可再跑多次的馬拉松，是彌足珍貴的體驗。
回到香港，行程緊湊，緊貼的是泰國布吉跑連馬。雖然天熱，但大會 Checkpoints 的補給充足，整體輕鬆得多了；與之相反的是，凌晨四點出發，大會無封路，發生咗聖母峰馬唔會發生的事: 有參賽者被電單車撞到！
布吉熱馬終點
聖母峰馬位處5300米，溫度低至零下；布吉僅高於海平面，溫度可飆到30度以上。一個多禮拜的時間，要做好兩次 Acclimatization 溫度適應，嘗盡冰火兩極。
痛苦係短暫，歷練乃永恒
Pain is Temporary，Experience is Everlasting
撰文: Mark Sir，西柚跑步會創辦人，熱愛跑步、街健、健力，每周帶領街坊健體、街跑
The post 母子檔冰火連馬 | 從5300米「聖母峰馬拉松」到海拔0米「布吉熱馬」 appeared first on Fitz 運動平台.
留言 0