呂爵安賀餅印妹妹17歲生日 梁詠琪笑問：有兩個Edan嗎

MIRROR成員呂爵安（Edan）係出名嘅妹控，錫妹錫到燶。噚日（30日）係Edan妹妹小如豬嘅17歲生日，作為廿四孝嘅阿哥梗係要做番啲嘢，喺IG出Post晒合照，留言：「親愛的，17歲生日快樂。希望你每天都過得開開心心，幸福快樂！」唔少網民同Edan好友Jeffrey、岑珈其、鄭欣宜、阮小儀等都紛紛留言祝細妹生日快樂。
而Edan兩兄妹向來都畀人話好似樣，五官幾乎餅印一樣；早前Edan玩變臉App男扮女裝，已被讚「美少呂」。而今次Edan上載嘅兩張相，一張正正經經面貼面，另一張就齊齊瞪大眼兼O嘴，表情趣怪，MIRROR成員之一嘅Stanley（邱士縉）留言話兩兄妹好似樣，梁詠琪（Gigi）更笑問：「圖二是有兩個Edan嗎？」