上架半日，約有18萬幾Views，不過相比起其他同門早前出的新曲MV的觀看次數還爭一點點。Anson Lo(江𤒹生)今次新歌〈信之卷〉MV特別之處就是玩動畫，全個MV都是日本動畫Feel，而且更有香港銅鑼灣景，完全滿足作為動漫迷的AK願望，成為動畫主角，一圓童年夢想。
新歌〈信之卷〉由Van@Nowhere Boys作曲、Oscar Lee填詞、王雙駿監製，而特別喜歡《龍珠》及《數碼暴龍》的AK，就找來香港動漫師崔氏兄弟及Tommy Ng兩個單位，製作出這個MV動畫，故事講述男主角經歷低潮，最後集合眾人力量戰勝心魔。當中AK提到：「我由細到大都好鍾意動畫、動漫……更會幻想自己就係動漫男主角。今次〈信之卷〉歌詞係講大家可以搵返童年時嘅初心，好似動漫男主角一樣勇往直前乜都唔怕……極度自肥係將自己鍾意嘅動漫元素擺晒落去，例如裏面會有好多《數碼暴龍》嘅元素，男主角會有一隻好似神獸但又似寵物嘅物體做陪伴。」
而AK亦出力推動本地藝術，大讚：「其實香港都有好犀利嘅人，睇到動漫師做嘅過程，同佢哋開會，知道佢哋點樣畫，所有嘢都非常專業，所以再一次多謝佢哋，同時希望多啲人發現，香港有好多藝術工作者，不同嘅創作或文化藝術都係非常優秀。」
