第3季大陸經濟增長4.6%，叫做好過預期增長4.5%，可能大家都會有懷疑，粒數有幾真，因為始終聽親大陸啲經濟情況差多過好，但至少國統局公佈頭3季大陸發電量7.06萬億千瓦時，增加5.4%，至少無咁多需求，真係無謂發咁多電，電廠賣唔出電都會蝕得好甘。
但係經濟增長來源喺邊呢？大陸頭3季社會消費零售總額35.36萬億元人民幣，按年增長3.3%，9月份按年增長3.2%。但睇返2024年首八個月，上海社會消費零售總額11,889億元人民幣，按年下跌3.3%；北京期內社會消費品零售總額9,102億元人民幣，按年下降0.9%；廣州期內社會消費品零售總額7,285億元人民幣，按年下降0.5%；深圳期內社會消費品零售總額6,861.32億元，按年增長1.1%。
北上廣深，社會消費零售總額頭3大嘅都要下跌，反而排最尾嘅深圳，點解可以喺消費降級大環境下逆市上升？當然其中一個主要原因就係有香港人日日北，香港人雖然有錢，但最多都係頂到深圳，遠少少廣州都已經頂唔到，更何況北京同上海。執筆之時北上廣深都未公佈個別相關數字，但如果按照首3季升幅去解釋，只能估計係其他一線以外城市發力，或者北上廣深9月情況真係好好。
當然唔係質疑數據真偽，因為如果粒數係假，基本上都無得傾落去。我哋假設9月情況好轉係因為大陸推出多項政策，刺激到經濟，大家願意消費返。問題係，中國真係要推更多措施持續刺激經濟，頭7個月中國31個省級行政區，除咗上海財政做到有盈餘，其餘都係財政赤字，最少嘅天津財赤413億人民幣，最多嘅四川財赤去到4,130億人民幣；頭半年包括企業所得稅同個人所得稅嘅稅收收入下跌5.6%，呢啲都側面證明中國經營環境同國民收入都有下降，並非短期消費好轉可以解決。
而家中國經濟似乎更多由出口推動，雖然9月情況差過預期，但至少頭3季人民幣計價出口值18.6萬億人民幣，按年升6.2%，升幅唔錯。不過隨住貿易摩擦不斷升級，所以推動經濟實際啲都係從消費出發比較好。
大陸已經減息降準，但要推動經濟同消費無咁快見效，所以刺激A股利用財富效應倒推捉進消費，未嘗唔係一個方法，只係現時推出2,000億額度嘅證券、基金、保險公司互換便利（SFISF），同埋股票回購增持再貸款，真係需要更重磅嘅措施。尤其中國整體債務情況唔太樂觀，就算回購貸款利率只係1.75厘，但推動股價呢啲帳面數字，對公司實際發展無咁大幫助，倒不如將呢啲貸款，直接畀企業做發展更好。至少回購推動股市作用有幾大，睇下今年上半年上證走勢能知一二。
金缸經
註：專欄作家言論不代表本網立場
密切留意BossMind動向！立即CLS
留言 0