「連贏三場波，對我嚟講仲未稱得上穩定，最多話我地開始要達成某啲目標。」英超三連勝之後，利物浦重燃競爭歐洲賽資格嘅希望，戰術同成績都令人眼前一亮。
回顧四月嘅比賽，利物浦先比曼城大勝4-1，之後對車路士、阿仙奴呢兩支倫敦球隊都打和。但休息一段時間後，球隊表現脫胎換骨。「我而家覺得仲ok嘅嘅，但主要係因為我哋受到啲唔想受到嘅教訓，唔代表我哋已經脫離困境。」主帥高普就話，球隊永遠仲有進步嘅空間。
歐洲球壇近幾季開始增設第三級歐洲賽「歐協盃」，表示每國聯賽可以出戰歐洲賽事嘅門檻降低咗。但對利物浦嚟講，32輪過後只得第七名，更有機會比白禮頓從後趕上，若然只能勉強搶到歐協盃嘅出線資格，以利物浦今季嘅投資嚟講，表現好難令球迷滿意。嚟緊要對付熱刺，雙方只差1分，同樣係徘徊喺幾個歐洲賽席位嘅排名之間，大戰意味甚濃。
截至4月29日，+22嘅得失球差，喺中上遊球隊嚟計算係鶴立雞群，但唔好唔記得對曼聯嗰場7-0嘅勝仗，先至利物浦有咁高嘅得失球差。「如果我哋再唔搞啲花臣出嚟，咁球迷對我哋今季嘅印象，就只會停留喺贏曼聯7-0嗰場波度。」
「但我哋唔夠穩定，呢樣係我哋要努力改變嘅嘢。」雖然戰績不佳，但高普都話球隊打得出佢想見到嘅表現：「我哋要踢出最好嘅表現，說服球迷我哋係得嘅。
近期嘅比賽戰術上，右閘阿歷山大阿諾更多時間出現喺防中位置協助組織，右路拉邊由沙拿分擔，直接將TAA呢幾場波嘅進攻數據拉高，亦令球隊取得三連勝，保持歐洲賽資格嘅競爭力。
但呢三場比賽嘅對手，都係英超排名靠後嘅球隊。最近一場波2-1險勝韋斯咸，當中更加有判決爭議。TAA喺防中位派牌組織，對上壓迫力強嘅球隊，分分鐘會為對手打開右路嘅缺口，變相增加中堅嘅體能消耗去移防補位。利記嚟緊兩場波連對熱刺、富咸，尾二一場英超更加要對後來居上搶歐洲賽席位嘅阿士東維拉，場場硬仗。
無論點都好，高普嘅調整能力，依然係利物浦搶分嘅關鍵，困難嘅地方，係喺尋找新戰術出路，同維持既有戰術框架搶分，兩者之間取得平衡。
留言 0